Երեւանի ավագանու արտահերթ ընտրություններին մասնակցում է 12 ուժ՝ 8 կուսակցություն, 4 դաշինք: Նրանցից որոշները քաղաքական դաշտում մշտապես ակտիվ են եղել եւ հանրությանը հայտնի են:
Որոշ կուսակցություններ, սակայն, ակտիվությամբ աչքի չեն ընկել եւ հիմա փորձում են այդ բացը լրացնել՝ մասնակցելով Երեւանի ավագանիում տեղեր զբաղեցնելու մրցապայքարին:
Քաղաքական դաշտում մշտապես ակտիվություն ցուցաբերած ուժերին առիթներ ունեցել եւ դեռ ունենալու ենք անդրադառնալու, եւ հենց դրանից ելնելով «Ռադիոլուր»-ն այսօր որոշել է ներկայացնել հանրությանը քիչ հայտնի ուժերին, որոնք մտել են մայրաքաղաքի ղեկավարման իրավունք ստանալու համար պայքարի մեջ:
Երեւանի ավագանու ընտրություններին մասնակցող «Հայք» հայկազուններ կուսակցությունը նոր անուններից մեկն է: «Հայք» կուսակցության ցուցակը գլխավորող Գեւորգ Հովսեփյանն ասաց, որ իրենք այնքան էլ անհայտ չեն: Գործում են 1991 թվականից եւ տարբեր ժամանակներում տարբեր նախաձեռնություններով են հանդես եկել:
Զրուցակիցս կարծիք հայտնեց, որ երեւանցին ընտրությունների պետք է գնա ոչ թե ընտրելու այս կամ այն կուսակցությունը կամ անհատին, այլ՝ գնա ընտրելու իր կյանքը, թե՝ ինչպիսի կյանք է ինքը պատկերացնում:
Այդ պատկերացումներն ու ծրագրերն էլ իրենք նոր չէ, որ ունեն: Իրենց համար մի բան հստակ է, որ ընտրվելու դեպքում քաղաքը կառավարելու են ոչ թե չինովնիկների, այլ՝ մասնագետների միջոցով:
«Հայք» կուսակցությունը կոնկրետ ուղղություններով իր մշակած ծրագրերը եւ ունեցած առաջարկները մանրամասնորեն կներկայացնի հանրությանը, երբ սեպտեմբերի 10-ից մեկնարկի նախընտրական քարոզարշավը՝ ասաց Գեւորգ Հովսեփյանը: Նույն օրը ծրագիրը պաշտոնապես կհրապարակի նաեւ «Ռեֆորմիստների» կուսակցությունը: Կուսակցության նախընտրական ցուցակը գլխավորում է կինոռեժիսոր Արտակ Ավետյանը: Այս կուսակցությունը ակտիվ քաղաքականությամբ չի զբաղվել, սակայն, դա կուսակցությունում խնդիր չեն համարում:
Երբ ներկայացնեն արդեն իրենց ծրագրերը, ընտրողները որոշակի հստակ կարծիք կկազմեն՝ հավելեց Գրետա Հովհաննիսյանը:
Հանրությանը քիչ ծանոթ քաղաքական ուժերից մեկն էլ, որ մասնակցում է Երեւանի ավագանու ընտրություններին Ժողովրդավարական ուղի կուսակցությունն է: Թեպետ այս կուսակցությունն ընտրություններին մասնակցելու որոշակի փորձ ունի՝ ավելի քան մեկ տասնամյա վաղեմությամբ:
ԺՈՒԿ-ի ներկայացուցիչներից Արթուր Գասպարյանը մեզ հետ զրույցում շեշտեց, որ ծրագրային լայն սպեկտր ունեն, որ առաջիկայում կներկայացնեն:
Կուսակցությունը հիմնադրել է նախկին ընդդիմադիր պատգամավոր Մանուկ Գասպարյանը: Վերջինի մահվանից հետո կուսակցության նախագահ է ընտրվել նրա որդին՝ Մանուել Գասպարյանը:
Նա էլ Երեւանի ավագանու արտահերթ ընտրություններում գլխավորում է կուսակցության ընտրական ցուցակը:
