Հուզմունք, տագնապ, ցնցում, շփոթվածություն, վախ, հիասթափություն, հոգեկան ապրումներ, մարդու կյանքի նորմալ ընթացքի խախտում, դժվարություններ, որոնց հետ մարդը մինչ այդ չէր առնչվել. դեպքերի մեծամասնությունում հենց այս զգացողություններն են ուղեկցում մարդուն «քաղցկեղ» բառը լսելիս:
Ընտանիք, ընկերներ, զբաղվածություն, հավատ ու պայքար սեփական առողջության համար. գործոններ, որոնք կարևոր են այդ ծանր շրջանը հոգեբանորեն հաղթահարելու ու առաջ շարժվելու համար: Եվ այդ ծանր ճանապարհին, բուժման գործում հաջողության հասնելու գրավականը իհարկե բժիշկն է, բուժառուի բոլոր ապրումների ականատեսն ու ամենամեծ գոտեպնդողը, որ քաղցկեղը դատավճիռ չէ, պետք է հավատալ, ուժեղ լինել, պայքարել ու հաղթահարել։
Ուռուցքաբանություն կամ օնկոլոգիա. բժշկագիտության ճյուղ, բժշկության ամենաարագ զարգացող ոլորտ, որն ուսումնասիրում է ուռուցքների առաջացման պատճառները, զարգացման մեխանիզմները, կլինիկական ընթացքը, մշակում բուժման ու կանխարգելման մեթոդները։
Օրգանիզմում ուռուցքային պրոցեսների հայտնաբերմամբ և բուժմամբ է զբաղվում ուռուցքաբանը, չափազանց անհրաժեշտ մասնագիտություն, որը պահանջում է մասնագիտական առավելագույն գիտելիքներ, ծայրաստիճան պատասխանատվություն և ուշադրություն, անընդհատ կատարելագործում ու վերապատրաստում և, որն ամենակարևորն է, չափազանց օգտակար մասնագիտություն, որը հնարավորություն է տալիս փրկելու կյանքեր։
Ամբողջ աշխարհում մեծ տարածում գտած այդ հիվանդությունից ոչ ոք ապահովագրված չէ: Ու չնայած բժշկությունը տարեցտարի քաղցկեղի դեմ պայքարի նոր, ավելի արդյունավետ ու անվտանգ մեթոդներ է մշակում, ակնհայտ է, թե որքան կարևոր է ուռուցքային հիվանդությունների վաղ հայտնաբերումը, ճիշտ ախտորոշումը, բժշկին ամբողջովին հավատալն ու սեփական առողջության համար պայքարը:
Զրույց Հայաստանի քաղցկեղի և արյան հիվանդությունների կենտրոնի մանկական ուռուցքաբանության բաժանմունքի ղեկավար, Մխիթար Հերացու անվան Երևանի պետական բժշկական համալսարանի արյունաբանության և մանկական ուռուցքաբանության ամբիոնի դասախոս Լիլիթ Սարգսյանի հետ:
