Գեղարքունիքի մարզի Նորակերտ համայնքում տասնամյակներ շարունակ խմելու ջրի խնդիրը չէր լուծվում: Թեև գյուղը մեծ չէ, ունի 890 բնակիչ, սակայն խմելու ջուրը մինչև հիմա մատակարարվում է գրաֆիկով․ մի քանի օր գյուղի մի մասն է ջուր ունենում, մի քանի օր՝ մյուս մասը:
Մեր այցի ընթացքում Նորակերտում ակտիվ աշխատանքներ էին ընթանում՝ ջրագծերն էին փոխվում, գյուղացիները նոր ջրատարից միացում էին անում:
««Ջրի հարցը կամաց-կամաց լուծվում է: Մոսկվան հո միանգամից չի կառուցվել: Էս խեղճն էլ եկել, դատարկ բյուջեի վրա նստել է․ ո՞րն անի, գյուղում էնքան շատ խնդիրներ կան»:
«Ջուրը տալիս էին փողոց-փողոց, թաղամաս- թաղամաս: Հիմա էս երկու օրը նոր սկսել են ջրատարը փոխել, դեռ չգիտենք՝ մշտական ջուր կլինի՞, թե՞չէ»,-ասացին գյուղացիները:
Զրուցեցինք նաև համայնքի ղեկավար Գերասիմ Սարգսյանի հետ: Նա տեղեկացրեց, որ ջրատարի հիմնանորոգման աշխատանքներն ամբողջությամբ կավարտվեն երկու տարվա ընթացքում։ Այս պահին ներքին ցանցն են բարեկարգում.
«Համայնքում ներքին ցանցը գրեթե 90 տոկոսով վերանորոգվել է, շուրջ 4,5 կմ ջրագիծ է բարեկարգվել: Աշխատանքներն իրականացվում են 2019 թվականի ծրագրով: Իսկ 2020 թ.-ի ծրագրով ներառված է ևս 2,5 կմ, որից հետո միայն գյուղում ջրի խնդիրը կարող ենք համարել լուծված: Այս խնդրի լուծման համար համայնքից պահանջվում է 30 տոկոս, իսկ կառավարությունից՝ 70 տոկոս մասհանում»:
Գերասիմ Սարգսյանի փոխանցմամբ՝ շինարարական աշխատանքների մրցույթը կամփոփվի առաջիկա օրերին, որից հետո կմեկնարկի շինարարությունը և կավարտվի երեք ամիսների ընթացքում: Ընդհանուր առմամբ՝ ջրատարի ներքին ցանցի ընդհանուր երկարությունը շուրջ 7150 մետր է:
«Գյուղի ջրի խնդիրը մինչև փոխելն էր կար, հիմա էլ կա, քանի որ գյուղը սնվում է 15 կմ հեռավորության վրա գտնվող աղբյուրներից: Մինչև գյուղ հասնելը Ակունք համայնքը և Վարդենիսի Սև հողեր թաղամասը նստած են այդ ջրագծի վրա, այդ իսկ պատճառով համայնքում կա ջրի խնդիր: Ակունք համայնքում պետք է կառուցվի ջրահավաք ավազան և դրա միջոցով դոտացիա տրվի մեր ջրագծին, որպեսզի կարողանանք ամբողջ գյուղը մատակարարել ջրով»:
Ակունք համայնքից սնվող կարգավորիչ ջրամբարում վերակառուցման և ջրաքանակի ավելացման աշխատանքներ նախատեսում են իրականացնել հաջորդ տարվա ընթացքում՝ սուբվենցիոն հերթական ծրագրի շրջանակներում: Դրանից հետո միայն համայնքը կանցնի շուրջօրյա ջրամատակարարման և խմելու ջրի խնդիրն ամբողջությամբ կլուծվի Նորակերտում:
Հավելենք նաև, որ Գեղարքունիքի մարզպետարանի զարգացման ծրագրերի, զբոսաշրջության և վերլուծության բաժնի տվյալներով՝ ծրագրի նախնական ընդհանուր արժեքը 21 միլիոն դրամ է, որի 70 տոկոսը կամ 14 միլիոն 700 հազար դրամը հատկացնում է ՀՀ կառավարությունը, 30 տոկոսը կամ 6 միլիոն 300 հազար դրամը՝ Նորակերտի համայնքապետարանը:
