Ճոխ սեղանների մրցավազք. մեկնարկը տրված է
Սպառողների ոլորտն ուսումնասիրող հասարակական կազմակերպություններն արդեն նախատոնական ուսումնասիրություններ են կատարել շուկայում և պարզել, թե որքան գումարով հնարավոր կլինի պատրաստել ամանորյա սեղան:
«Սպառողների խորհրդատվություն կենտրոն» հ/կ նախագահ Կարեն Չիլինգարյանի դիտարկմամբ` այս տարի ևս առաջին անհրաժեշտության ապրանքների գները բարձրացել են:
Այդուհանդերձ թանկ սեղանից ձերբազատվելու իր տարբերակն է առաջարկել ազգագրագետ Սվետլանա Պողոսյանը: Արդյո՞ք մեր համաքաղաքացիների մոտ դեռևս արմատացած է ճոխ սեղանների մրցավազքը և ինչքան է կազմում նրանց ամանորյա զամբյուղը:
Առջևում Ամանոր է և խանութներում արդեն իսկ նկատվում է տոնական եռուզեռը: Նախորդ տարիների պատկերը հաշվի առնելով, շատերը կփաստեն, որ սեղանների ճոխությունը շատ դեպքերում մեր համաքաղաքացիները փորձում են ապահովել նաև վարկերի միջոցով, ինչն էլ որոշ խանութներ տեղում արագ կազմակերպում են: Ինչպես նախորդ տարիներին, այս տարի նույնպես սպառողի ամանորյա զամբյուղը թանկացել է:
«Սպառողների խորհրդատվություն կենտրոն» հ/կ նախագահ Կարեն Չիլինգարյանն արդեն ուսումնասիրել է շուկան ու արձանագրել` առաջին անհրաժեշտության ապրանքները թանկացել են: Նախորդ տարվա նույն ժամանակահատվածի հետ համեմատ տավարի միսը թանկացել է 20-25 տոկոսով, խոզինը` 15-20 : Մրգի շուկայում թանկացումներին զուգահեռ կան նաև էժանացումներ: Օրինակ` արքայախնձորի 1 կգ- արժե 700-800 դրամ, իսկ նախորդ տարի 1200-1500 էր: Ի վերջո, որքա՞ն գումար է անհրաժեշտ ամանորյա սեղան պատրաստելու համար. հարցիս զրուցակիցս ներկայացրեց հաշվարկները:
«Սոցիալապես անապահով խավը ծայրը ծայրին հասցնելով 30. հազար դրամով կկարողանա պատրաստել սեղանը, իսկ ինչ վերաբերում է միջին սպառողին նվազագույն ծախսերով` 70 -100 հազար դրամի սահմաններում հնարավոր կլինի սեղան գցել»:
Կարեն Չիլինգարյանի հաշվարկները տոնական երկու- երեք օրերի համար են նախատեսված: Հայկական ավանդական սեղանների մրցավազքի] ազգագրագետ Սվետլանա Պողոսյանն առաջարկում է ձերբազատման իր տարբերակը: Տոնը պետք է տոն դարձնել ոչ սեղանով, այլ տոնական ատրիբուտներով` նվերներ պատրաստելով, տոնածառ զարդարելով, միմյանց տուն հաճախելով ու օրվա հոգսերից ազատվելով: Պետք չէ տոնական սեղանը դարձնել հոգս:
«Տոնն իսկապես նրա համար է, որ մենք ոչ թե անհանգստանանք, լարվենք, այլ հանգստանանք առօրյայից: Պետք չէ ուտելիքը դարձնել գերխնդիր»:
Մեր համաքաղաքացիներն այս տարի կարծես թե հետևում են հորդորներին և զարկ չեն տալիս համադամ կերակրատեսակներով ճոխ սեղաններին: Յուրաքանչյուրը փորձելու է սեղան պատրաստել գրպանին հարմար: «Ռադիոլուրի» հարցախույզի արդյունքները համենայն դեպս այդպես ցույց տվեցին:
Ի դեպ, քրիստոնեական տոնացույցով Ամանորը պահքի շրջան է և պետք է այն նշել պասային ուտեստներով սեղանների շուրջ: