Գեներալ Հյուսնունց. «Ոչ ոք իրավունք չունի մեզ համար այդքան թանկ հաղթանակը սեփականաշնորհել»
«Երբ արցախյան պատերազմն սկսվեց՝ հայկական կողմն ուներ ընդամենը մի քանի տանկ, իսկ արդեն ավարտից հետո դրանք քառապատկվեցին»,- «Ռադիոլուրին» պատմում է արցախցի գեներալ Վյաչեսլավ Հյուսնունցը։ Նա 1992- 2006 թ-ին զբաղեցրել է Ղարաբաղի ինքնապաշտպանական ուժերի գլխավոր շտաբի հրամանատարի սպառազինության գծով տեղակալի պաշտոնը: Գեներալը պատմել է նաև, որ ռուս փորձագետներից մեկը մի անգամ նույնիսկ ասել է, թե Ռուսաստանում տանկերի փողը վերանորոգում են հատուկ գործարաններում, իսկ ղարաբաղցիները՝ հենց ռազմի դաշտում։ Գեներալի հետ «Ռադիոլուրը» զրուցել է նաև ապրիլյան պատերազմի սխալների ու ձեռքբերումների մասին:
Հյուսնունցների գերդասատանին ճանաչում են ոչ միայն Արցախի Մարտակերտ քաղաքում, այլև նրա սահմաններից դուրս: Վյաչեսալավ Հյուսնունցը նրանցից մեկն է, ով Արցախի բանակի կայացման գործում ունեցած անձնական նվիրումի համար պարգևատրվել է «Մարտական խաչ» առաջին աստիճանի շքանշանով, «Մարտական ծառայության համար», «Մարշալ Բաղրամյան», «Շուշիի ազատագրության համար», «Մայրական երախտագիտության» և ուրիշ մեդալներով:
Բանակի ակունքներում կանգնած գեներալը չնայած այս պահին ծառայության մեջ չէ, վաստակած հանգստի է անցել, բայց լիովին տիրապետում է իրավիճակին: Ասում է, որ մենք ապրիլյան պատերազմի օրերին զինամթերքի խնդիր չենք ունեցել՝ ուղղակի թշնամին ավելի լավ է սպառազինված ու պատրստված եղել, մեր խնդիրները այլ տեղ են եղել: «Մենք կազմակերպչական խնդիր ունենք, պետք ամեն ինչ լինի հասցեական ու մասնագիտական մոտեցում ցուցաբերվի»,- ասում է Վյաչեսլավ Հյուսնունցը:
Հիշեցնենք՝ Վյաչեսլավ Հյուսնունցը 1992- 2006 թթ.-ին զբաղեցնում էր Ղարաբաղի ինքնապաշտպանական ուժերի գլխավոր շտաբի հրամանատարի սպառազինության գծով տեղակալի պաշտոնը: Նրա հրամանատարության տակ գտնվում զրահատանկային եւ հրթիռահրետանային ծառայությունները։
Ապրիլյան պատերազմի օրերին, ու մինչ հիմա, մենք բազմիցս ենք անդրադարձել մեր զինվորների պատրաստվածությանը ու մարտունակությանը՝ գիտակցելով, որ մեծ է նաև հրամատարական կազմի ներդրած ավանդը: Սակայն եղան դեպքեր, երբ հրամանատարներից ոմանք թերացան իրենց պարտականություններում Զրուցակիցս ասում է, որ նման դեպքեր յուրաքանչյուր բանակում լինում է, և լավ է, որ մեզ մոտ մասշտաբային դեպքեր չգրանցվեցին,այլ եղան առանձին դեպքեր, երբ «ոմանք իրենց ճիշտ չպահեցին»:
Գեներալի հետ խոսում ենք նաև հերոսների սինդրոմի մասին: Զարմանում է, թե ինչու պետք է լինեն մարդիկ, ովքեր արտոնյալ կարգավիճակում լինեն պատերազմական գործողություններից հետո: «Կա օրենք ու օրենքի առաջ բոլորն են հավասար: Եթե սխալ քայլեր են կատարել, ապա օրենքի առաջ պետք բոլորը պատասխան տան,- ասում է գեներալ Հյուսնունցը ու մեկ անգամ ևս հիշեցնում,- հաղթանակը ոչ թե գլխավոր հրամանատարից մինչև վերջին զինվորն են կռել, այլ՝ ողջ հայ ժողովուրդը։ Այսօր ոչ ոք իրավունք չունի մեզ համար այդքան թանկ հաղթանակը սեփականաշնորհել»: