Արծաթագործ Արմեն Վարդապետյանն ինքնուս է։ Իր գիտելիքներն այս ոլորտից նա ստացել է՝ հետևելով փորձառու արծաթագործներին, ծանոթանալով հնամենի պեղածո իրերին, ուսումնասիրելով ձեռագիր մատյանները։
Նա ասում է, որ իրեն առանձնապես հրապուրում է կիլիկյան մանրանկարչական դպրոցը, նրա զարդանախշերն ու գույները։
Վարպետը գտնում է, որ իսկական արծաթագործը չպետք է տուրք տա ժամանակակից տեխնոլոգիաներին, քանի որ այդտեղ իրը պատրաստվում է հանձնարարված սխեմայի համաձայն, և խաբեություն է այն ներկայացնել որպես ձեռքի աշխատանք։
Նա ասում է, որ այդպես նսեմացվում է իսկական վարպետների տքնաջան աշխատանքը։ Վարպետի «ՎԱՌ» անունը կրող ապրանքանիշը երկար տարիներ սիրված է և ճանաչված։
