ՀՀ կառավարության նոր որոշմամբ հստակեցվել են այն արտասահմանյան բեռնատարների տվյալները (տեսակը, քանակը և ծագման երկիրը), որոնց վրա կտարածվի ճանապարհային հարկի արտոնյալ (ցածր) դրույքաչափը՝ Հայաստան մուտք գործելիս կամ մեր երկրով տարանցիկ փոխադրումներ կատարելիս։
Ըստ այդմ՝ Սևծովյան տնտեսական համագործակցության կազմակերպության «BSEC Permit» և Տրանսպորտի նախարարների եվրոպական կոնֆերանսի (ՏՆԵԿ) բազմակողմ թույլտվությունների համակարգերով բեռնափոխադրումներ իրականացնող ճանապարհային հարկ վճարողները կազատվեն ճանապարհային հարկի վճարման պարտավորությունից։
Որոշման ընդունմամբ ակնկալվում է խթանել ՀՀ տարածքով այլ պետություններում գրանցված (հաշվառված) բեռնատար ավտոտրանսպորտային միջոցներով դեպի երրորդ երկրներ իրականացվող տարանցիկ փոխադրումները, ինչպես նաև բարձրացնել Հայաստանի միջազգային հեղինակությունը միջազգային տրանսպորտային միջանցքներում նրա ներգրավվածությամբ պայմանավորված։
