Ամենասովորական աշնանային առավոտը պատերազմի լուրով բացվեց։ Էդգարը ծանր երկընտրանքի առաջ էր՝ մտածել ծնողների մասին, թե՞ լինել եղբոր՝ Դավիթի կողքին, որը ժամկետային զինծառայող էր Արցախում։ Ի վերջո, հաղթեց ավագ եղբոր պարտքի զգացումը։ Էդգար Ծատինյանը 44-օրյա պատերազմին մասնակցել է որպես կամավորական, հրաձիգ էր։ Մեկնել էր ծնողներից թաքուն, նպատակը Մարտակերտում ծառայող եղբորը հասնելն էր, բայց հայտնվեց Մարտունի 3-ում։ Թեև եղբորը ֆիզիկապես չհասավ, բայց մարտադաշտում գտավ նոր եղբայրներ, որոնց երբեք չի մոռանա։ Չի մոռանա հատկապես Էդգարին՝ իր անվանակցին ու բազմաթիվ հարցերում նաև նմանակցին, որին բացահայտել էր րոպեների ընթացքում, րոպեների ընթացքում էլ կորցրել․․․
Էդգարի խոսքով՝ պատերազմից հետո երևի ավելի դժվար է, քան հենց պատերազմի ժամանակ։ Բայց համոզված է՝ կյանք վերադառնալ ու կյանքին այո՛ ասել հնարավոր է։ Ծնվել է 1994 թվականի մայիսի երեքին Երևանում։ Ավարտել է Ագրարային համալսարանը: «MONTANA Music House» ժամանցի կենտրոնում աշխատում է որպես դիջեյ։
