«Եթե քաղաքացին եկել է բռնկման օջախից, դա արդեն ցուցում է, իսկ եթե եկել է Չինաստանի, օրինակ, Պեկին քաղաքից, ապա թեստ կանցնի միայն բժշկական ցուցումներից հետո։ Քաղաքացին չի կարող առանց կլինիկական ախտանիշի ժամանել կլինիկա և ասել՝ բարև ձեզ, ես ուզում եմ կորոնավիրուսի թեստ անցնել», – «Ռադիոլուրի հյուրասրահ»–ում ասել է առողջապահության նախարար Արսեն Թորոսյանը՝ արձագանքելով ֆեյսբուքյան քննարկումներին, թե Չինաստանից վերադարձած քաղաքացիներին կլինիկաներում հրաժարվում են թեստավորել։
ՖԲ օգտատերերից մեկը՝ Գագիկ Բարսեղյանն օրերս ժամանել է Չինաստանի Գուանչժոու քաղաքից և թոքաբորբ ախտորոշմամբ արդեն մի քանի օր «Նորք» ինֆեկցիոն կլինիկական հիվանդանոցում է, ահազանգել էր, թե բժիշկները հրաժարվում են իրեն կորոնավիրուսի թեստ անել` պատճառաբանելով, որ վիրուսի բռնկման օջախից` Ուհանից չի եկել եւ հիվանդությանը բնորոշ լուրջ ախտանիշեր չունի:
«Ես ծանոթ եմ դեպքին, նրա մոտ հայտնաբերվել է այլ վիրուս, սակայն նա պնդում է, որ անպայման անցնի թեստը, ինչը հավանաբար կարվի որպես բացառություն։ Բայց խնդրում եմ ավելորդ խուճապ և լարվածություն չտարածել»,–ասել է Թորոսյանը։
Նախարարը խոսել է նաև բժշկական ապահովագրության ներդրման, ոլորտում նախատեսվող ծրագրերի մասին։
Իսկ պատասխանելով հարցին, թե ինչու է հաճախ հայտնվում քննադատությունների թիրախում, նաև թիմակիցների շրջանում, երկու պատճառ է նշել։
«Գուցե անձով է պայմանավորված․ ես չեմ վարանում մեր փոփոխությունների մասին խոսել, առաջարկել, երբեմն հասկանալով, որ դա կարող է դիմադրություն առաջացնել։ Բայց քանի որ կոնկրետ այդ փոփոխությունները հանգեցնում են դրական արդյունքի, չեմ տրվում լավ երևալու գայթակղությանը, թե ես ամենալավն եմ և ինձ չեն քննադատում»,– ասել է Թորոսյանը։
