Երևանի «Ոսկե ծիրան» 23-րդ միջազգային կինոփառատոնը ներկայացրել է Տարածաշրջանային մրցույթի ժյուրիի ամբողջական կազմը։
Իբրահիմ Մաալուֆն աշխարհահռչակ լիբանանցի ջազ երաժիշտ է, որն ապրում և ստեղծագործում է Ֆրանսիայում։ Նա երկու անգամ առաջադրվել է Գրեմմի մրցանակի, իսկ 2017-ին արժանացել ֆրանսիական Սեզար մրցանակի «Սիբիրյան անտառներում» ֆիլմի երաժշտության համար։
Քրիստինե Հարությունյանն ամերիկահայ ռեժիսոր, սցենարիստ և պրոդյուսեր է, որի դեբյուտային լիամետրաժ «Երազելուց հետո» կինոնկարի պրեմիերան կայացել է Բեռլինի միջազգային փառատոնի «Ֆորում» ծրագրում։
Պիտեր-Յան Դե Պյուն բելգիացի կինովավերագրող է (ծնվ․ 1982-ին՝ Գենտում), որը նկարահանել է «Լուսավորյալների երկիրը» ֆիլմը (Լավագույն օպերատորական աշխատանք, Սանդենս 2016) և CPH:DOX 2026-ին ներկայացրել իր երկրորդ վավերագրությունը՝ «Մարինկա»-ն, որը փառատոնի բացման ֆիլմն էր և արժանացել է Հանդիսատեսի համակրանքի մրցանակին:
Դոմինիկ Վելինսկին ֆրանսիացի պրոդյուսեր է, որի ընկերությունը ֆիլմեր է համարտադրել աշխարհի բազմաթիվ երկրներում։ Վելինսկին նաև հանդես է գալիս որպես Կաննի կինոփառատոնի զանազան ծրագրերի խորհրդական։
Մահմուդ Քալարին, որն իրանական կինոյի վարպետներ Քիառոստամիի, Փանահիի, Մախմալբաֆի և ուրիշների գլուխգործոցների նշանավոր օպերատորն է, կգլխավորի Տարածաշրջանային մրցույթի ժյուրին։
Երևանի «Ոսկե ծիրան» 23-րդ միջազգային կինոփառատոնը կանցկացվի 2026 թվականի հուլիսի 12–19-ը։ Այս տարի ևս կինոփառատոնը կներկայացնի մրցութային և արտամրցութային ծրագրեր աշխարհի տարբեր երկրներից, ինչպես նաև ֆիլմեր հեղինակավոր միջազգային կինոփառատոններից՝ ներառյալ Կաննը, Բեռլինը և այլ առաջատար կինոհարթակներ։
Փառատոնի ընթացքում Հայաստան կժամանեն կինոյի համաշխարհային ճանաչում ունեցող հեղինակներ, ռեժիսորներ, դերասաններ և ոլորտի մասնագետներ, որոնք իրենց փորձն ու արվեստը կներկայացնեն հայ հանդիսատեսին՝ ստեղծելով երկխոսության, նոր գաղափարների և մշակութային փոխանակման բացառիկ հարթակ։
Մահմուդ Քալարին կնախագահի «Ոսկե ծիրան»-ի Տարածաշրջանային մրցույթի ժյուրին
