Գեղանկարչի լռության մեջ ծաղկում են նոր գույներ․ «Շարուկ ակներ»

Գեղանկարիչ Սամվել Թավադյանը 2023 թվականի սեպտեմբերյան բռնագաղթից հետո ոչ նկարում է, ոչ երաժշտություն լսում։ Եթե 2020 թվականի սեպտեմբերից մինչև 2023 թվականի սեպտեմբեր` պատերազմից պատերազմ միջանկյալ լռությունն ուղեկցվել է ստեղծագործական աշխատանքով, ապա 2023- ի սեպտեմբերից հետո շարունակվում է միայն գեղանկարչի լռությունը։ Այն մենք պայմանականորեն անվանում ենք ստեղծագործական դադար, որին գուցե հաջորդի ծաղկուն մի շրջան, ստեղծվեն բարձրորակ կտավներ` խտացված ասելիքով։

Շուշիում, Ստեփանակերտում, Հայաստանում, արտասահմանյան մի շարք երկրներում Սամվել Թավադյանը քանիցս կազմակերպել է անհատական ցուցահանդեսներ, մասնակցել համատեղ ցուցադրությունների և միջազգային սիմպոզիումների։ Ափսոսում է Շուշիում մնացած գործերի համար։ Դրանք մոտ 200-ն էին։ Իր գործերից չի առանձնացնում որևէ մեկը։ Մեր զրույցում գեղանկարիչն ասում է` բոլորի մեջ հոգի եմ դրել, բոլորի համար սիրտս մղկտում է, բոլորին սիրում եմ, քանզի ես եմ նրանց կյանք պարգևել։