Կանադացի առաջին փորձագետը կմիանա Հայաստանում ԵՄ առաքելությանը առաջիկա ամիսներին՝ Հայաստանի հանրայի ռադիոյին տեղեկացրել են Հայաստանում ԵՄ պատվիրակությունից։
«Առաքելության անձնակազմի ընդհանուր թիվը 103 է՝ ներառյալ տեղացիները: Առաքելությունը ներկայումս ունի 48 դիտորդ (8 դիտորդ յուրաքանչյուր օպերատիվ կենտրոնում): Առաքելության անդամները ներկայացնում են ԵՄ անդամ 23 պետություն: Կանադացի առաջին փորձագետը կմիանա առաքելությանը առաջիկա ամիսներին»,- նշել են ԵՄ պատվիրակությունից:
Անդրադառնալով հարցին, թե ինչպիսի աջակցություն է տրամադրում ԵՄ-ն Եվրոպական խաղաղության հիմնադրամի շրջանակներում՝ ԵՄ պատվիրակության գրասենյակից պատասխանել են․ «ԵՄ-ն գործընկերների զինված ուժերին տրամադրում է բոլոր տեսակի սարքավորումներ և ենթակառուցվածքներ՝ մարդու իրավունքների միջազգային իրավունքի և միջազգային մարդասիրական իրավունքի համապատասխան, որպեսզի ամրապնդի գործընկերների կարողությունները՝ կապված ռազմական և պաշտպանական հարցերի հետ։»։
Ինչ վերաբերում է զեկույցներին, ԵՄ առաքելությունը պատրաստում է պարեկային հաշվետվություններ միայն ներքին օգտագործման համար: «Մենք այս զեկույցների բովանդակությունը չենք բացահայտում արտաքին լսարանին: Բրյուսելում ԵՄ անդամ երկրները պարբերաբար տեղեկացվում են առաքելության աշխատանքի մասին»։