Նոր ծրագիր՝ Արցախում գործազրկության մեղմացման համար
Լուսինե Ավանեսյան
Ռադիոլուր-Ստեփանակերտ
Գյուղական բնակավայրերում գործազրկության մեղմացման համար Արցախում այս տարի նոր ծրագիր են սկսել: Որոշել են պետական բյուջեից ֆինանսավորել գյուղերում կատարվող հասարակական աշխատանքները: Օրերս մեկնարկել են նման առաջին ծրագրերը:
Գիշին Արցախի մեծ համայնքներից մեկն է: Չնայած դրան՝ գյուղատնտեսությամբ զբաղվող համայնքը ինքնաֆինանսավորող չէ: Մի շարք հարցեր, այդ թվում նաեւ համայնքային ծառայողների աշխատավարձը պետական բյուջեի միջոցներով են լուծում:
Առաջիկայում գյուղը պետական միջոցների նոր ներհոսք կունենա, սակայն այս անգամ գումարը ոչ թե կփոխանցվի համայնքապետարանի բյուջե, այլ կվճարվի յոթ գործազուրկների: Պետությունը որոշել է ֆինանսավորել նախկինում հասարակական հիմունքներով, անվճար կատարվող, իսկ շատ հաճախ բարձիթողի մնացած ներհամայնքային աշխատանքները:
Գիշու դեպքում դա գերեզմանոցի եւ աղբյուրներից մեկի ջրուղիների մաքրումը:
Ռաջ Բաղրանի ընտանիքի հիմնական եկամուտը անհատական տնտեսությունից է գոյանում, եկամուտն անկայուն է եւ աշնանային այս օրերին, երբ ավարտել են բերքահավաքը, հավելյալ աշխատանքն ու եկամուտը ընտանեկան բյուջեն լրացնելու լավ միջոց են:
Օրական ստանալու են հինգ հազար դրամ, սակայն ողջ ծրագիրն ավարտելուց հետո. պետության հետ կնքված պայմանագրի համաձայն վճարումը կատարվելու է ըստ կատարողականի: Դրա համաձայն են ստանալու նաեւ ընթացքում ձեռքբերված ապրանքների արժեքը:
Երկու ծրագրերում Գիշու համայնքը համաֆինանսավորողի դերում է` հարյուր հազարական դրամով: Համայնքապետ Աշոտ Հայրապետյանն ասում է, որ գերեզմանոցի մաքրման աշխատանքները հաշվի առնելով՝ համագյուղացիներից մեկը ֆինանսավորել է ճանապարհի բարեկարգումը:
Վարձատրվող հասարակական աշխատանքների ծրագիրը մեկնարկել է այս տարվա ապրիլին: Նախարարությունում մոտ քսան հայտ-ծրագիր են ստացել: Դրանց մի մասը վերադարձվել է լրամշակման: Այս տարվա բյուջեում ծրագրի համար քսան միլիոն դրամ է նախատեսված. յուրաքանչյուր ենթածրագիր կարող է հավակնել մոտ երկու միլիոն դրամի: Գիշու երկու նախագծերի ընդհանուր արժեքը մոտ մեկ միլիոն դրամ է։ Դրանց ավարտին պարզ կդառնա հանրավոր է արդյոք փոքր ներդրումով մեծ աշխատանք կատարել՝ ասում են պատասխանատուները: