Արցախում ընտրությունները հետաձգելու հերթական կոչ-հայտարարությունն է արել նախագահի պաշտոնի հավակնորդներից մեկը: Ռուսլան Իսրայելյանը մրցակիցներին կոչ է արել միանալ իրեն և դիմել իշխանություններին՝ Արցախում արտակարգ դրություն մտցնելու և ընտրությունները հետաձգելու առաջարկով:
Այս առաջարկին միացել են նախագահի թեկանծուներից Մասիս Մայիլյանը, Հայկ Խանումյանը, Սերգեյ Ամիրյանը, Աշոտ Դադայանը, Քրիստին Բալայանը: Այսօր ընտրությունները հետաձգելու պահանջով հանարհավաք էր հրավիրել Արցախի հեղափոխական կուսակցությունը:
«Նոր կորոնավիրուս համավարակի տարածման մասին վերջին տեղեկությունները խիստ մտահոգիչ են, ինչը մեզ բերում է այն եզրահանգման, որ այս պայմաններում համապետական ընտրությունների անցկացումը շատ մեծ ռիսկեր է պարունակում, առավել ևս ռիսկային գոտուց եկած հարյուրավոր դիտորդների ու զորանոցային ռեժիմից հանած բանակայինների շփումներից բխող վտանգը նկատի ունենալով, ինչն ուղիղ սպառնալիք է ազգային անվտանգությանը»: Սա հատված է արցախյան ընտրություններին մասնակցող 6 թեկնածուների համատեղ հայտարարությունից:
Թեկնածուներն առաջարկում են արտակարգ դրություն հայտարարել: Նախագահի թեկանծու Հայկ Խանումյանը կոչին միացողներից է: Ասում է, չի սպասում, որ իշխանությունը կարձագանքի դրան:
Խնդրի իրավական կողմը արդարադատության նախարար Արարատ Դանիելյան է մեկնաբանում: Օրենսդրությամբ կարող է մտցվել արտակարգ իրավիճակ, որը ընտրությունների հետաձգում չի նախատեսում:
Այսօր Ստեփանակերտում նույն պահանջով միտինգ էր հրավիրել Հեղափոխական կուսակցությունը:
Վաղը կուասկցությունը դարձյալ միտինգի է հրավիրում ընտրությունները հետաձգելու կողմնակիցներին:
Նախագահի թեկնածու Վիտալի Բալասանյանը, որն արատկարգ դրություն մտցնելու առաջին կոչ անողն էր, երեկ Արցախի նախագահին է տրամադրել իր իրավաբանական թիմի կազմած տեղեկանքը, որում ներկայացված են «բավարար հիմքեր արտակարգ դրություն հայտարարելու իրավաչափության համար»:
Ռուսլան Իսրայելյանի, Մասիս Մայիլյանի, Հայկ Խանումյանի, Քրիստին Բալայանի, Սերգեյ Ամիրյանի և Աշոտ Դադայանի համատեղ կոչում ասվում է, որ ամեն գնով ընտրություների անցկացումը կասկածի տակ է դնելու ընտրությունների լեգիտիմությունը։ Նախագահի թեկանծուները հորդորել են նաև Արցախի անվտանգության երաշխավոր ՀՀ իշխանություններին՝ նպաստելու իրավիճակին համարժեք միջոցների ձեռնարկմանն Արցախում։
