Թեման չափազանց զգայուն է, հայտարարել է Կրեմլի խոսնակ Դմիտրի Պեսկովը մեկնաբանելով Ս-400 զենիթահրթիռային համալիրները այլ երկրի վաճառելու Թուրքիայի մտադրությանը։
«Մենք թուրքական կողմի հետ շփումներ ունեցել ենք այս հարցի շուրջ եւ կշարունակենք այդ շփումները»,- Պեսկովի խոսքերն է մեջբերում ՏԱՍՍ- ը։
Այսօր ավելի վաղ թուրքական իշխանամետ Hürriyet թերթը հայտնել էր, որ Անկարան Ռուսաստանից ձեռք բերված Ս-400 զենիթահրթիռային համալիրները վաճառել է Պարսից ծոցի երկրներից մեկին։ Թերթի տվյալներով՝ գործարքի մասին պաշտոնապես կհայտարարվի մոտ ժամանակներս։Oksijen թերթն իր հերթին հավանական գնորդ նշել է Արաբական Միացյալ Էմիրությունները։
Hürriyet-ը գրել էր, որ Անկարան իրավական լուծում է փնտրում, որը կբավարարի ԱՄՆ-ին, որպեսզի Թուրքիան դուրս բերվի ամերիկյան CAATSA պատժամիջոցներից եւ վերադառնա նոր սերնդի F-35 կործանիչների արտադրության ծրագրին։
Թուրքիան 2017 թվականին Ռուսաստանից ձեռք էր բերել Ս-400 հակաօդային պաշտպանության համակարգերի 4 դիվիզիոն՝ 2,5 միլիարդ դոլար արժողությամբ։ 2019 թվականի հոկտեմբերին «Ռոսօբորոնէքսպորտ» ընկերությունը հայտնել էր, որ մատակարարման պայմանագիրն ամբողջությամբ կատարվել է։
Թուրքիայի եւ Ռուսաստանի միջեւ Ս-400-ների մատակարարման պայմանագրի կնքումից հետո Անկարան հայտնվել է Վաշինգտոնի պատժամիջոցների տակ եւ զրկվել F-35 կործանիչների արտադրության եւ ձեռք բերման ծրագրից։
