Եվրոպական խորհրդի նախագահ Անտոնիո Կոշտան և Եվրոպական հանձնաժողովի նախագահ Ուրսուլա ֆոն դեր Լեյենը ներկայացրել են ԵՄ-ն Ֆրանսիայի Էվիան քաղաքում կայացած G7 գագաթնաժողովի արդյունքները։
«Մեծ յոթնյակի» առաջնորդները հանդես են եկել մի շարք համատեղ հայտարարությամբ՝ անդրադառնալով աշխարհաքաղաքական, տնտեսական և անվտանգության կարևորագույն հարցերին։
Գագաթնաժողովի առանցքային արդյունքներից մեկը Ուկրաինային աջակցության վերահաստատումն էր։ G7-ի առաջնորդները հայտարարել են, որ կշարունակեն աջակցել Ուկրաինայի ազատությանը, ինքնիշխանությանը և տարածքային ամբողջականությանը, ինչպես նաև կավելացնեն երկրի օդային պաշտպանության հնարավորությունները, կուժեղացնեն էներգետիկ դիմադրողականությունը և կխստացնեն Ռուսաստանի նկատմամբ պատժամիջոցները, այդ թվում՝ նավթի և գազի ոլորտներում։
Մերձավոր Արևելքի վերաբերյալ
Առաջնորդները ողջունել են ԱՄՆ-ի և Իրանի միջև ձեռք բերված համաձայնության մասին հայտարարությունը՝ ընդգծելով, որ պատրաստ են աջակցել դրա իրականացմանը։ Նրանք նաև վերահաստատել են, որ Իրանը չպետք է ձեռք բերի միջուկային զենք, աջակցել են Լիբանանում հրադադարի հաստատման և «Հեզբոլլահի» զինաթափման ջանքերին, ինչպես նաև կոչ արել դադարեցնել բռնությունները Արևմտյան ափին և արագացնել Գազայի մարդասիրական ու վերականգնման աշխատանքները։
Տնտեսական օրակարգում G7-ի առաջնորդները վերահաստատել են բազմակողմ համագործակցության հանձնառությունը՝ նպատակ ունենալով ապահովել ավելի հավասարակշռված, կայուն և դիմակայուն համաշխարհային տնտեսական աճ։ Նրանք ընդգծել են էներգիայի, պարարտանյութերի և գյուղատնտեսական միջոցների մատակարարման շղթաների անխափան աշխատանքի կարևորությունը, կոչ արել խուսափել կամայական արտահանման սահմանափակումներից և պաշտպանել ազատ ու անվտանգ միջազգային առևտուրը։
Առանձնահատուկ ուշադրություն է դարձվել նաև կարևոր հանքանյութերի մատակարարման շղթաների անվտանգությանը՝ դրանք գնահատելով որպես տնտեսական անվտանգության, էներգետիկ անցման և թվային տեխնոլոգիաների զարգացման ռազմավարական բաղադրիչ։
Գագաթնաժողովի ընթացքում առաջնորդները նաև քննարկել են միջազգային գործընկերության ամրապնդումը, քաղցկեղի դեմ պայքարը, միգրանտների և թմրանյութերի ապօրինի շրջանառության դեմ պայքարը, ինչպես նաև անչափահասների առցանց անվտանգության ապահովմանն ուղղված նախաձեռնությունները։
