ԱՄՆ զինված ուժերը փետրվարի 9-ի գիշերը առգրավել են Aquila II նավթային լցանավը, որը, արևմտյան և ուկրաինական աղբյուրների համաձայն, կապվում է Ռուսաստանի «ստվերային նավատորմի» հետ։
Վերջինս, ըստ գնահատականների, օգտագործվում է միջազգային պատժամիջոցները շրջանցելու նպատակով, ասվում է ԱՄՆ պատերազմի նախարարության X սոցիալական հարթակում արված հրապարակման մեջ։
Ըստ հաղորդագրության, նավթատարը գործել է՝ խախտելով ԱՄՆ նախագահ Դոնալդ Թրամփի սահմանած պատժամիջոցները։ Նշվում է, որ Aquila II-ը փորձել է խուսափել հետապնդումից, սակայն ԱՄՆ ուժերը հետևել են նրան Կարիբյան ծովից մինչև Հնդկական օվկիանոս, և ի վերջո, առգրավել այն։
ԱՄՆ-ն հայտարարել է, որ շարունակելու է կանխել պատժամիջոցների շրջանցման փորձերը և պատասխանատվության ենթարկել նման գործողություններում ներգրավված բոլոր անձանց՝ անկախ նրանց գտնվելու վայրից։
