Անցյալ շաբաթ Կիև կատարած այցի ժամանակ ԱՄՆ բանակի նախարար Դեն Դրիսկոլը ուկրաինացի պաշտոնյաներին ասել է, որ Ուկրաինան մարտադաշտում անխուսափելի պարտության առջև է կանգնած, հաղորդում է NBC News-ը՝ հղում անելով երկու տեղեկացված աղբյուրների։
Ռուսական ուժերը մեծացնում են իրենց օդային հարձակումների մասշտաբներն ու հաճախականությունը, և նրանք կարող են անվերջ շարունակել մարտական գործողությունները։ Իրավիճակը միայն կվատանա Ուկրաինայի համար, և ավելի լավ է խաղաղության շուրջ բանակցել հիմա՝ խուսափելու համար ավելի թույլ դիրքում հայտնվելուց, ասել է Դրիսկոլը՝ ըստ հեռուստաընկերության աղբյուրների։
Նա նաև զգուշացրել է, որ ԱՄՆ-ն չունի Ուկրաինային անհրաժեշտ քանակությամբ զենք և ՀՕՊ համակարգեր մատակարարելու կարողություն։
«Ուղերձի էությունն այն էր, որ դուք պարտվում եք, և դուք պետք է համաձայնեք գործարքի», — NBC News-ը մեջբերել է իր անանուն զրուցակցի խոսքերը։
Դրիսկոլը անցյալ շաբաթ ամերիկյան պատվիրակության հետ այցելել էր Կիև՝ Ուկրաինայի նախագահ Վլադիմիր Զելենսկիին՝ պատերազմը դադարեցնելու ԱՄՆ-ի մշակած ծրագիրը ներկայացնելու համար։ Դրիսկոլը Զելենսկիից բացի հանդիպել էր Ազգային անվտանգության և պաշտպանության խորհրդի քարտուղար Ռուստեմ Ումերովի, պաշտպանության նախարար Դենիս Շմիգալի և այլ պաշտոնյաների ու զինվորականների հետ։
