Միլանի քաղաքապետ Ջուզեպպե Սալան հայտարարել է, որ Ջորջիո Արմանիի հուղարկավորությունը տեղի կունենա երկուշաբթի օրը և որ քաղաքում այդ օրը կհայտարարվի սգո օր՝ ի հիշատակ աշխարհահռչակ դիզայների։
«Երկուշաբթի օրը՝ նրա հուղարկավորության օրը, կհայտարարվի սգո օր», — ասել է քաղաքապետը հայտարարության մեջ։
Դիզայները կյանքից հեռացել է այսօր՝ 91 տարեկան հասակում։ Armani Group-ի տվյալներով՝ նա մահացել է խաղաղ՝ շրջապատված իր ընտանիքի և ընկերների հետ։ Հուղարկավորությունը տեղի կունենա Միլանում՝ Armani/Teatro ցուցահանդեսային կենտրոնում, և կլինի մասնավոր։
Ընկերությունը, սակայն, մամուլի հաղորդագրության մեջ չի նշել արարողության ամսաթիվը։
Դիզայներ Ջորջիո Արմանին, ով օգնել է Իտալիային դառնալ համաշխարհային նորաձևության առաջատար և հագցրել է Հոլիվուդի ամենահայտնի աստղերին, մահացել է 91 տարեկան հասակում։ Նրա հիմնադրած և ավելի քան հինգ տասնամյակ ղեկավարած ընկերությունը հինգշաբթի օրը հայտնել է այդ մասին։ Արմանին համադրել է դիզայների տաղանդն ու բիզնեսի հմտությունը՝ ղեկավարելով շուրջ 2.3 միլիարդ եվրո (2.7 միլիարդ դոլար) տարեկան շրջանառություն ապահովող անկախ ընկերությունը։ «Անսահման վշտով Armani Group-ը հայտարարում է իր հիմնադրի, ստեղծողի և անխոնջ շարժիչ ուժի՝ Ջորջիո Արմանիի մահվան մասին», — նշված է նորաձևության տան հաղորդագրությունում։ «Մենք, նրա աշխատակիցներն ու ընտանիքի անդամները, պարտավորվում ենք պահպանել և շարունակել այն, ինչ նա ստեղծել է, նրա հիշատակին հարգանքով, պատասխանատվությամբ և սիրով», — հավելել է ընկերությունը։ Վերջին շրջանում դիզայները առողջական խնդիրներ ուներ և ստիպված էր բաց թողնել Միլանի տղամարդկանց նորաձևության շաբաթվա ցուցադրությունները՝ առաջին անգամ իր կարիերայում։ Դերասանուհի Ջուլիա Ռոբերտսը, ով 1990-ին «Ոսկե գլոբուս»-ին հայտնվել էր Armani-ի տղամարդու կոստյումով, Ինստագրամում կիսվել է դիզայների հետ լուսանկարով՝ ուղեկցելով այն կոտրված սրտի էմոջիով ու գրելով․ «Իսկական ընկեր։ Լեգենդ»։ Արմանին մնացել էր իր ընկերության միակ սեփականատերը՝ աշխատելով վաղեմի գործընկերների և ընտանիքի անդամների սերտորեն կապված խմբի հետ։ «Նա բոլորին վերաբերվում էր որպես հավասարների և իրեն շատ հարմար էր զգում երիտասարդների շրջանում։ Նա մեզ հրավիրում էր ծննդյան երեկույթների ու ընթրիքների իր Բրոնիի առանձնատանը, և մենք զգում էինք, որ իսկապես կարևոր ենք նրա համար», — պատմել է Մաուրո Բարբիերին, ով 32 տարի աշխատել է Armani-ի միլանյան պահեստում։ Շաբաթ և կիրակի օրերին Միլանում կբացվի հուղարկավորության սրահ, որպեսզի մարդիկ կարողանան հարգանքի տուրք մատուցել։ Հուղարկավորությունը նախատեսվում է երկուշաբթի՝ փակ դռների հետևում։ Հայտնի որպես «Re Giorgio» (Իտալերեն՝ «Թագավոր Ջորջիո»), նա վերահսկում էր իր բիզնեսի բոլոր մանրամասները՝ սկսած գովազդից մինչև մոդելների սանրվածքները։ Այս ամիս Միլանի նորաձևության շաբաթվա ընթացքում նախատեսվում էր ցուցահանդես և միջոցառումներ՝ նվիրված Armani Group-ի 50-ամյակին, որը դիզայները 1975 թվականին հիմնադրել էր իր սիրային զուգընկեր Սերջիո Գալեոտիի հետ։ Ընկերության ղեկավարման պարտականությունները այժմ կստանձնեն ընտանիքի անդամները՝ զարմուհիներ Սիլվանան ու Ռոբերտան, զարմիկ Անդրեա Կամերանան և նրա երկարամյա աջ ձեռքը՝ Պանտալեո Դել’Օրկոն։ Սակայն նրա մահը անխուսափելիորեն հարցեր է առաջացնում ընկերության ապագայի վերաբերյալ։ Արմանիի մինիմալիստական ոճը, հատկապես բաճկոնների համար, 1970-ականների վերջին և 1980-ականներին մեծ հաջողություն ունեցավ ԱՄՆ-ում։ Կանայք, ովքեր այն տարիներին փորձում էին հաստատվել դեռևս տղամարդկանց կողմից ղեկավարվող բիզնես աշխարհում, նրա հագուստում գտնում էին նրբագեղության և ուժի կատարյալ համադրություն։ «Նրա հաճախորդները տարիներ շարունակ հավատարիմ էին նրա ոճին։ Հատկապես պրոֆեսիոնալ կանայք հետևում էին նրա փիլիսոփայությանը», — նշել է նորաձևության պատմաբան Վիրջինիա Հիլը։
