ԵՄ արտաքին քաղաքականության հարցերով բարձր ներկայացուցիչ Կայա Կալասը կիրակի օրը հայտարարել է, որ Ուկրաինան և Եվրոպան պետք է լինեն Վաշինգտոնի և Մոսկվայի միջև Ուկրաինայի պատերազմի ավարտի վերաբերյալ ցանկացած համաձայնագրի մաս, հաղորդում է Reuters-ը։
Նա ասել է, որ երկուշաբթի օրը կգումարի Եվրոպայի արտաքին գործերի նախարարների հանդիպում՝ հետագա քայլերը քննարկելու համար։
«ԱՄՆ-ն կարող է Ռուսաստանին ստիպել լուրջ բանակցություններ վարել։ ԱՄՆ-ի և Ռուսաստանի միջև ցանկացած համաձայնագիր պետք է ներառի Ուկրաինան և ԵՄ-ն, քանի որ սա անվտանգության հարց է Ուկրաինայի և ամբողջ Եվրոպայի համար», — ասել է Կալասը։
ԱՄՆ նախագահ Դոնալդ Թրամփը ուրբաթ օրը Ալյասկայում կհանդիպի Ռուսաստանի նախագահ Վլադիմիր Պուտինի հետ։
Ըստ Կալասի՝ «միջազգային իրավունքը հստակ է. բոլոր ժամանակավորապես օկուպացված տարածքները պատկանում են Ուկրաինային»։ «Համաձայնագիրը չպետք է դառնա ցատկահարթակ Ուկրաինայի, տրանսատլանտյան դաշինքի և Եվրոպայի դեմ Ռուսաստանի հետագա ագրեսիայի համար», — հավելել է նա։
Տես նաև՝ Զելենսկին իր աջակցությունն է հայտնել Ուկրաինայի վերաբերյալ եվրոպական երկրների հայտարարությանը
