Ավելի քան տասը տարի է, ինչ «Այբ» դպրոցում գործում է յուրօրինակ նախագծային կրթական ծրագիր՝ «Ռոքեստր»-ը, որը համադրում է կրթությունը, մշակույթը և ժամանակակից երաժշտությունը։ Այս նախագիծը ղեկավարում է կոմպոզիտոր Վահագն Պապայանը՝ նորարարական կրթությանը և պրոգրեսիվ արվեստին նվիրված մոտեցումներով։ Ծրագրի հիմնական նպատակը դեռահասների ստեղծագործական մտքի զարգացումն է՝ երաժշտության միջոցով, ինչպես նաև նրանց մեջ ինքնարտահայտման, համագործակցության և լսելու մշակույթի ձևավորումը։
«Ռոքեստր»-ը պարզապես դպրոցական բենդ չէ, այլ ուսումնառության մի ձև է, որտեղ ուսուցիչը հանդես է գալիս որպես ուղեկից և համահեղինակ, իսկ սովորողը՝ որպես ինքնուրույն երաժիշտ։ Ինչպես նշում են ծրագրի այս տարվա մասնակիցներ Էրիկ Ալոյանն ու Հարություն Քոչարյանը, «Ռոքեստր»-ը դառնում է յուրահատուկ միջավայր, որտեղ դպրոցականը չի կրկնօրինակում, այլ ստեղծում է՝ սեփական ոճով ու ձայնով։
Ծրագիրը եզրափակվում է ուսումնական տարեվերջյան հաշվետու համերգով, որը տարեցտարի ձեռք է բերում նոր հայեցակարգային շեշտադրումներ։ Այս տարվա համերգը նվիրված էր պրոգրեսիվ երաժշտությանը՝ համակցելով ռոքը վիզուալ արվեստի տարրերի հետ։ Համերգը վերածվեց մի ամբողջական ներկայացման, որտեղ երաժշտությունը, լուսային լուծումները և բեմադրական մոտեցումները ստեղծեցին հաղորդակցման նոր լեզու։
Հատուկ ուշադրության է արժանի սերնդափոխության գործընթացը՝ որպես «Ռոքեստր»-ի անբաժան բաղադրիչ։ Տարեցտարի երաժիշտ սաներն իրենց փորձը փոխանցում են նորերին, իսկ ծրագիրը շարունակվում է՝ առանց կորցնելու իր էներգիան։
«Այբ» դպրոցի «Ռոքեստր»-ը փաստում է, որ երբ կրթությունը համադրվում է մշակույթին՝ ստեղծվում է նոր իրականություն, որտեղ աշակերտը դառնում է ոչ միայն գիտելիքի կրող, այլև մշակույթ արարող։
