Տաշիրի համայնքային կենտրոնում Ռուսական կենտրոնի բացման հանդիսավոր արարողությանը մասնակցել են ՀՀ-ում Ռուսաստանի Դաշնության արտակարգ և լիազոր դեսպան Սերգեյ Կոպիրկինը, Տաշիրի քաղաքապետարանի ղեկավար Էդգար Արշակյանը, «Տաշիր» բարեգործական հիմնադրամի նախագահ Վահե Կարապետյանը և «Մեր ապագան» հիմնադրամի գործադիր տնօրեն Վահրամ Կարապետյանը:
Կենտրոնը ստեղծվել է «Մեր ապագան» կրթամշակութային բարեգործական հիմնադրամի նախաձեռնությամբ՝ «Տաշիր» բարեգործական հիմնադրամի և քաղաքապետարանի աջակցությամբ:
«Տաշիրը մի վայր է, որտեղ հայերն ու ռուսները պատմականորեն դարեր շարունակ ապրել են կողք կողքի։ Ռուսական կենտրոնի ստեղծումը պարզապես իրադարձություն չէ, այլ ընդհանուր մշակութային ավանդույթի շարունակություն։ Մենք վստահ ենք, որ կենտրոնը կդառնա քաղաքի մշակութային և կրթական կյանքի անբաժանելի մասը», — նշել է Տաշիրի քաղաքապետարանի ղեկավար Էդգար Արշակյանը։
«Ռուսական կենտրոնները միայն մշակութային և կրթական հարթակներ չեն։ Դրանք երկխոսության տարածքներ են, որտեղ ծնվում է փոխադարձ վստահություն, որտեղ լեզուն դառնում է կապող օղակ մարդկանց, տարածաշրջանների, երկրների միջև։ Տաշիրում կենտրոնի բացումը ևս մեկ ներդրում է Հայաստանի և Ռուսաստանի միջև կայուն մարդասիրական կապերի զարգացման գործում», — նշել է «Մեր ապագան» հիմնադրամի գործադիր տնօրեն Վահրամ Կարապետյանը։
