Ռուսաստանի ուղղակի ներդրումների հիմնադրամի ղեկավար, օտարերկրյա երկրների հետ ներդրումների և տնտեսական համագործակցության հարցերով ՌԴ նախագահի հատուկ ներկայացուցիչ Կիրիլ Դմիտրիևն ուրբաթ օրը՝ ապրիլի 4-ին, Telegram-ում ներկայացրել է ԱՄՆ նախագահ Դոնալդ Թրամփի վարչակազմի ներկայացուցիչների հետ Վաշինգտոնում ունեցած իր հանդիպումների մասին որոշ մանրամասներ։
Նա ասել է, որ ամերիկացի պաշտոնյաների հետ շփումների հիմնական թեմաներից մեկը Ռուսաստանի և ԱՄՆ-ի հարաբերությունների վերականգնումն է եղել, «երկխոսության վերականգնումը, որն ամբողջությամբ դադարեցրեց և ընդհատեց Բայդենի վարչակազմը»։
Դմիտրիևի խոսքով՝ «շատ երկրներ փորձում են խաթարել ռուս-ամերիկյան հարաբերությունների վերականգնումը»։ Այնուամենայնիվ, Դոնալդ Թրամփի վարչակազմի ներկայացուցիչները «հավատարիմ են աշխարհաքաղաքական խնդիրների լուծմանը» և «նրանք լսում են Ռուսաստանի դիրքորոշումը շատ հարցերի վերաբերյալ», հավելել է նա։
Դմիտրիևը նշել է, որ ինքը և իր զրուցակիցները Վաշինգտոնում քննարկել են «տնտեսական և ներդրումային բնույթի հարցեր»։ Ըստ նրա՝ ամերիկյան շատ ընկերություններ ցանկանում են վերադառնալ ռուսական շուկա՝ զբաղեցնելով այն տեղը, որտեղից հեռացել են եվրոպական ընկերությունները։
«Մենք քննարկել ենք նաև Արկտիկայում հազվագյուտ հողային մետաղների հարցում փոխգործակցության հնարավորությունները», — շարունակել է նա: ՌԴ ԱԳՆ-ն աշխատում է նաև Ռուսաստանի և ԱՄՆ-ի միջև ուղիղ չվերթների վերականգնման ուղղությամբ։
Միևնույն ժամանակ, ամերիկյան Fox News հեռուստաալիքին տված հարցազրույցում Կիրիլ Դմիտրիևը Վաշինգտոն կատարած այցից հետո ասել է, որ Մոսկվան կարող է բաց լինել Կիևի անվտանգության երաշխիքների քննարկման համար։
Դմիտրիևը չի հստակեցրել, թե Ռուսաստանի Դաշնությունը անվտանգության ինչպիսի երաշխիքներ է համարում ընդունելի, սակայն կտրականապես բացառել է Ուկրաինայի մուտքը ՆԱՏՕ՝ այն անվանելով «ամբողջովին անհնար»։
