Հայկական մշակույթի հանրահռչակումն աշխարհում, անխոս, պետական մշակութային կազմակերպությունների կարևորագույն գործառույթներից մեկն է։ Բայց ոչ պակաս նշանակություն ունեն արտերկրյա կազմակերպությունները, որոնք աշխատում են՝ ստեղծելով մշակութային կամուրջներ Հայաստանի հետ։
«Սաթե-Աթղը» ֆրանսիական թատերական միության հիմնադիրներ Սաթե Խաչատրյանի և Էդգար Մանուկյանի ջանքերով ամեն տարի Հայաստանում և Ֆրանսիայում ուշագրավ մշակութային նախագծեր են իրականացվում։
«Մեզ համար շատ կարևոր է Հայաստանում ժամանակակից համաշխարհային թատրոնի ճանաչողության բարձրացումը, այդ առումով մենք կարող ենք մեր ներդրումն ունենալ միայն ֆրանսիական և ֆրանկոֆոն դրամատուրգիայի հանրահռչակման գործում։ Կարևորում ենք մեր թատրոնների խաղացանկերում ժամանակակից պիեսների առկայությունը, որն այսօր, ցավոք, բավարար չէ։ Բայց լիահույս ենք, որ մեր տեսլականը կիսող արվեստագետները կշատանան և այլ երկրների ժամանակակից թատրոնը հնարավորության չափով կբերեն Հայաստան։ Ժամանակակից պիեսների թարգմանությունն ինչ-որ առումով ժամանակակից թատրոնի պատմության փոխանցում է, որի կարիքն իսկապես մեծ է։ Իսկ Ֆրանսիայում մեր ծավալած մշակութային գործունեությունն ուղղված է հայկական մշակույթի հանրահռչակմանը, կարևոր է, որ մեր մշակույթը ճանաչելի դառնա պրոֆեսիոնալ մակարդակով, և այդ ուղղությամբ մենք աշխատում ենք 2013 թվականից», — ասում է Սաթե Խաչատրյանը։
Հաղորդման հյուրն ուսումը ստացել է Հայաստանում և Ֆրանսիայում, մասնագիտությամբ թատրոնի ռեժիսոր է, նաև բանասիրական գիտությունների թեկնածու, բազմաթիվ ներկայացումների ռեժիսոր, միջազգային նախագծերի հեղինակ և նախաձեռնող։
Սաթե Խաչատրյանը հայ-ֆրանսիական մշակութային հաղորդակցման հարթակներում բազմաթիվ հաջողված միջոցառումների կազմակերպիչ է, որոնց թվում են «Սասնա ծռեր», «Նռան գույնը», «Քոչար 360 աստիճան» և Միսակ Մանուշյանին նվիրված ներկայացումները։
