Երևանյան հուշարձաններին ու ճարտարապետական նշանակություն ունեցող շենքերին հարակից սրճարաններն ու նմանատիպ այլ կառույցները կապամոնտաժվեն: Աշխատանքային հերթական խորհրդակցության ժամանակ քաղաքապետ Տիգրան Ավինյանը հանձնարարել է կոնկրետ դեպքերով սկսել հետազոտել իրավական լուծումները:
«Կան սրճարաններ, որոնք բացարձակապես իրենց տեղում չեն, պետք է մաքրվեն, ինչպես նախորդ տարի հրապարակի պատկերասրահի կամարի տակի անհասկանալի վաճառքի կետը մաքրվեց: Այդպես պետք է շարունակվեն բոլոր նմանատիպ կետերը, միգուցե ավելի մեծ սրճարաններ:
Այդ իրավական կետերը պետք է գտնենք, որովհետև անվերջանալի տարատեսակ իրավական կետերին հղումներ անելով պահպանել այդ այլանդակությունները՝ ես չեմ պատրաստվում հանդուրժել, չեմ պատրաստվում հանդուժել նաև այն տրամաբանությունը, որ տարբեր դատական վճիռներով մետաղյա ինքնակամ շինություններ են պարտադրում, որ օրինականացվեն այն հատվածներում, որտեղ կանաչ գոտիներ պետք է լինեն՝ անկախ նախկինից եկած պրակտիկայից:
Ես հաշտ չեմ նմանատիպ վճիռների հետ, և դա խնդիր է լինելու մինչև այն պահը, որ մենք իրավական լուծումները գտնենք: Իրականում քաղաքը այլանդակել ես և, կարծում եմ, մենք բոլորս չպետք է թույլ տանք՝ անկախ իրավական հնարավոր թերացումներից, որ նախկինում եղել են»,- ընդգծել է քաղաքապետը:
