Տաքսի ծառայության մատուցման ոլորտի կարգավորման նպատակով կստեղծվի էլեկտրոնային հարթակ։ Հայաստանի վարչապետ Նիկոլ Փաշինյանին այս մասին են զեկուցել հունվարի 19-ին Պետական եկամուտների կոմիտեում կոմիտեի՝ 2023 թ. գործունեության հաշվետվությունը քննարկմանը:
Հարթակի գործարկումը նախատեսվում է 2024-ի սեպտեմբերի 1-ից:
2023 թ․-ի դեկտեմբերին Ազգային ժողովը Ազգային ժողովը երկրորդ ընթերցմամբ քննարկել և ընդունել էր «Ավտոմոբիլային տրանսպորտի մասին» և կից օրենքներում ու օրենսգրքերում առաջարկվող փոփոխությունները։
նախաձեռնությամբ սահմանվում է էլեկտրոնային հարթակով ուղևորափոխադրման ծառայության հասկացությունը՝ որպես ոչ կանոնավոր ուղևորափոխադրում:
Էլեկտրոնային հարթակներով ուղևորների փոխադրման պատվերներ ձևակերպելու և փոխանցելու գործունեությունը սահմանվում է որպես ծանուցման ենթակա գործունեություն: Նախաձեռնությամբ սահմանվում է նաև պատվերի վճարման էլեկտրոնային հսկիչ դրամարկղային մեքենայի կիրառության և պատվիրատուին էլեկտրոնային կտրոնի տրամադրման պահանջ:
Յուրաքանչյուր փոխադրման համար սահմանվում է արտոնագիր տրամադրելու պահանջ, որի համար պետական տուրքը կանխիկ դրամով վճարումների դեպքում 2024 թվականի սեպտեմբերի 1-ից կկազմի ընդհանուր արժեքի 2 տոկոսի չափով, 2025 թվականի հունվարի 1-ից՝ 3,5 տոկոսի չափով, 2026 թվականի հունվարի 1-ից՝ 5 տոկոսի չափով:
Անկանխիկ դրամով վճարումների դեպքում 2024 թվականի սեպտեմբերի 1-ից այն կկազմի 1,5 տոկոսի չափով, 2025 թվականի հունվարի 1-ից՝ 2,5 տոկոսի չափով և 2026 թվականի հունվարի 1-ից՝ 4 տոկոսի չափով:
Փոխադրման ընդհանուր արժեքից պետական տուրքի գանձման և պետական բյուջե վճարման լիազորությունը վերապահվում է էլեկտրոնային հարթակով ուղևորափոխադրման ծառայություն մատուցող կազմակերպություններին:
Էլեկտրոնային հարթակով ուղևորափոխադրման ծառայության մատուցման իրավունք ձեռքբերելու համար սահմանվում է 1 մլն դրամ պետական տուրքի պահանջ:
