Արհեստական բանականության համակարգերի ընդլայնման հետ մեկտեղ երբեմն առաջանում են հեղինակային իրավունքի հետ կապված սկանդալներ, քանի որ լեզվական մոդելները աշխատում են հանրությանը հասանելի հսկայական ծավալի տվյալների հետ: Apple-ը, ըստ The New York Times-ի աղբյուրների, այդ հանգամանքից ելնելով, ցանկանում է օրինական պայմաններ ստեղծել արհեստական բանականության իր համակարգերի համար և պատրաստ է առնվազն 50 միլիոն դոլար վճարել հրատարակիչներին, որպեսզի թույլ տան մուտք գործել իրենց արխիվներ։
Ըստ The New York Times-ի՝ Apple-ը վերջերս սկսել է բանակցություններ վարել անգլիալեզու խոշոր հրատարակիչների և լրատվամիջոցների հետ, որպեսզի հասանելի դարձնի նրանց նյութերի արխիվները՝ լեզվի սեփական մոդելները պատրաստելու համար:
Տեխնոլոգիական ոլորտում ամերիկյան ընկերությունների հետ համագործակցության հեռանկարների վերաբերյալ The New York Times-ի հարցմանը որոշ հրատարակիչներ զգուշավորությամբ են պատասխանել, քանի որ արդեն ոչ հաճելի փորձ են ունեցել Meta-ի հետ, որը շարունակաբար վերանայում է համագործակցության պայմանները:
Մի քանի հրատարակչությունների ղեկավարներ, որոնց դիմել են Apple-ի ներկայացուցիչները, համագործակցության համար առաջարկվող պայմանները համարել են չափազանց թույլ, քանի որ հեղինակային իրավունքի սեփականատերերը պետք է պատասխանատվություն կրեն Apple-ի կողմից իրենց մտավոր սեփականության օգտագործման հնարավոր հետևանքների համար։
Նաև պարզ չէ, թե Apple-ը ինչպես է օգտագործելու արհեստական ինտելեկտի համակարգը նորությունների ոլորտում: Որոշ հրատարակիչներ պարզապես վախենում են, որ Apple-ը ի վերջո կմրցի իրենց հետ: Այնուամենայնիվ, շուկայի որոշ մասնակիցներ սա լավ նշան են համարում, քանի որ Apple-ը իրենցից թույլտվություն է խնդրում արխիվային նյութերի հետ աշխատելու համար։
Apple-ի «ազնվությունն» այս հարցում հաստատվում է 2013 թվականին Topsy-ի գնման օրինակով։ Topsy-ը զբաղվում էր Twitter-ի էջերից տեղեկատվության հավաքագրմամբ, սակայն մասնագետներին հանձնարարվել էր դադարեցնել սոցիալական ցանցի օգտատերերի մասին տեղեկություններ հավաքել, քանի որ Apple-ը ելնում էր ենթադրությունից, որ նրանց թվում կարող են լինել նաև իր հաճախորդները, ինչը կխախտի հաճախորդների անձնական տվյալների հետ աշխատելու ընկերության սկզբունքները։
Տպագիր հրապարակումների դեպքում նման համագործակցությունը սահմանափակվում է առցանց մրցակիցների նկատմամբ «դասական մամուլի» ավանդաբար զգուշավոր վերաբերմունքով, և արհեստական բանականության համակարգեր մշակողները կարող են այս առումով որոշակի դիմադրության հանդիպել:
The New York Times-ը նշում է, որ Apple-ի ներկայացուցիչները հրաժարվել են մեկնաբանել այս տեղեկությունները։
