Բաքուն դատավճռով լուծում է միջազգային հանրության մեծացող ճնշմանը դիմագրավելու հարցը․Արա Ղազարյան

Բաքվի ծանր հանցագործությունների դատարանի կողմից հուլիսի 2-ի դատավճռով 4 ամսվա ազատազրկման դատապարտված 12 հայ ռազմագերիները կտեղափոխվեն Հայաստան՝ կարծում է  միջազգային իրավունքի մասնագետ Արա Ղազարյանը։ Նրա խոսքով՝  դատական ակտը, հավանաբար, չի բողոքարկվի, քանի որ մեղադրանքը փոխվել է հենց դատախազի պահանջով։

Հունիսի 16-ին Բաքվում սկսվել էր 14 հայ ռազմագերիների դատավարությունը, նրանք մեղադրվում էին ահաբեկչության, սահմանն ապօրինի հատելու, պատերազմական հանցագործությունների մեջ։ Հուլիսի 2-ի երեկոյան հրապարակված դատավճռով շիրակցի  14 գերիներից 2-ը՝ Հրաչ Ավագյանն ուԳեղամ Սերոբյանը, դատապարտվել են 4, իսկ մյուս 12 գերիները՝ 6 ամսվա ազատազրկման։ Մեղադրող դատախազը դատարանին խնդրել է փոխել մեղադրանքը և թողնել միայն մեկը՝  պետական սահմանի ապօրինի հատումը։

«Պետք է հիշել, որ Ադրբեջանում բռնապետական համակարգ է, և քրեաիրավական որակումը կարող է կտրուկ փոխվել, նույնիսկ օրենքի խախտումներով։ Կարծում եմ՝ հենց դա է տեղի ունեցել։ Հնարավոր է  քաղաքական ինչ-ինչ պայմանավորվածություններ են ձեռք բերվել։ Սրանով Բաքուն նաև միջազգային հանրության մեծացող ճնշմանը դիմագրավելու հարցն է լուծում», -ասում է Արա Ղազարյանը։

Հայ ռազմագերիները գերեվարվել են դեկտեմբերի 13-ին և արդեն 6 ամիս անազատության մեջ են, ինչը, Ղազարյանի կարծիքով,  նշանակում է դատական ակտի օրինական ուժի մեջ մտնելուց հետո գերիների ազատ արձակում, քանի որ լրացել է պատժի կրման ժամկետը։  Հաշվի առնելով հայերի նկատմամբ այդ երկրում առկա թշնամական մթնոլորտը ՝ Ղազարյանը հավանական է համարում հայ ռազմագերիների  տեղափոխումը երրորդ երկիր կամ ուղղակի վտարումը։ Ղազարյանը չի բացառում նաև 4 տարվա ազատազրկման դատապարտված 2 ռազմագերիների արտահանձնումը Հայաստանին ։