ԱԽ նիստում, որը հրավիրվել էր մայիսի 27-ին, զորքերը հայ-ադրբեջանական սահմանից հետ քաշվելու ու այդտեղ միջազգային դիտորդներ տեղակայելու մասին Նիկոլ Փաշինյանի առաջարկն ԱԳ նախարարի պաշտոնակատար Արա Այվազյանի համար անակնկալ չէր: Նիստից առաջ վարչապետը արտաքին գործերի նախարարին հայտնել է առաջարկության բովանդակության մասին, որի հետ կապված նախարարի կողմից առնվազն առարկություն չի հնչել: Խորհրդարանական ճեպազրույցների ժամանակ այս մասին ասել է «Իմ քայլը» խմբակցության ղեկավար Լիլիթ Մակունցը՝ անդրադառնալով Արա Այվազյանի հրաժարականին:
«Մնացյալ դրդապատճառների մասին ոչինչ ասել չեմ կարող, որովհետև չգիտեմ»,- նշել է Մակունցը:
ՀՀ վարչապետի պաշտոնակատար Նիկոլ Փաշինյանը մայիսի 27-ին ԱԽ նիստում առաջարկել էր Ադրբեջանի հետ սահմանին տեղակայել միջազգային դիտորդների, որոնք կներկայացնեն Ռուսաստանը կամ Մինսկի խմբի համանախագահ մեկ այլ երկիր, որին հետևել էր ԱԳ նախարարի պաշտոնակատար Արա Այվազյանի հրաժարականը։
