Արարատի մարզպետ Գարիկ Սարգսյանը հանդիպել է մարզի խաղողագործների և խաղող մթերող ընկերությունների ներկայացուցիչների հետ: Մարզպետարանում կազմակերպված քննարկմանը մասնակցել են նաև ՀՀ էկոնոմիկայի փոխնախարար Արման Խոջոյանը և մարզից ընտրված պատգամավորներ Ռուստամ Բաքոյանը և Սեդրակ Թևոնյանը:
«Խաղողագործների մտահոգությունն այն էր, որ բերքն այս տարի շատ է և հնարավոր է մթերման հետ կապված խնդիրներ առաջանան: Սակայն խաղող մթերող ընկերության ներկայացուցիչները վստահեցրեցին, որ գյուղացիների խաղողը դաշտում չի մնա և գնային քաղաքականությունից դժգոհելու առիթ նույնպես գյուղացիները չեն ունենա»,- գրել է նա ֆեյսբուքի իր էջում:
Մարզի խաղողագործները կարճ ժամանակով փակել էին ճանապարհը։ Մարզպետն անմիջապես հանդիպել էր բողոքի ակցիայի մասնակիցների հետ և պայմանավորվել հանդիպել մարզպետարանում, որտեղ կլինեն նաև խաղող մթերող ընկերությունների ներկայացուցիչները, և որոնց հետ կքննարկվեն խաղողագործներին մտահոգող հարցերը:
«Հանդիպումը, ինչպես և խոստացել էի, կայացավ, այն անցավ փոխըմբռնման մթնոլորտում և խաղողագործները ստացան իրենց հուզող բոլոր հարցերի պատասխանները»,- գրել է նա:
