Երևանում Աբովյան 32 հասցեի հուշարձան-շենքում անօրինական միջամտություն է տեղի ունենում: Այդ մասին քիչ առաջ ֆեյսբուքյան ուղիղ եթերում տեղեկացրեց Երևանի քաղաքապետի մամուլի խոսնակ Հակոբ Կարապետյանը՝ նշելով, որ 2018 թվականից առաջ կառուցապատողը դուռ բացելու շինթույլտվություն է ստացել: Բայց 2018 թվականին քաղաքապետարանը որոշումը կասեցրել է, և կառուցապատողը կասեցման որոշումը վիճարկել է դատարանում:
Կարապետյանի խոսքերով՝ վերջերս Առաջին ատյանի դատարանը բավարարել է հայցատուի հայցը, բայց քաղաքապետարանը բողոքարկել է Վերաքննիչ դատարանում: Ըստ մամուլի խոսնակի՝ օրինական ուժի մեջ մտած դատավճիռ չկա, և որևէ գործողություն անելը հակաօրինական է, բայց աշխատանքները շարունակվում են՝ պատը քանդելու աշխատանքներն են ավարտին հասցվել, աստիճաններ են տեղադրվել, ընդ որում՝ երկրորդ անգամ: Առաջին անգամ քաղաքապետարանի աշխատակիցները ապամոնտաժել էին:
Հակոբ Կարապետյանը նաև քաղաքապետարանի հաղորդման հիման վրա հարուցված քրեական գործի առկայության մասին տեղեկացրեց:
