Հասմիկ Դիլանյան
«Ռադիոլուր»
Նիկոլ Փաշինյանի ամերիկյան այցի հերթական կանգառը Նյու Յորքն է, որտեղ Հայաստանի կառավարության ղեկավարը հանդիպել է հայ համայնքի հետ: Փաշինյանը հայտարարել է, որ կոռուպցիայի դեմ պայքարից բավարարված չէ:
Այստեղ հարցերի ու հայտարարությունների հիմնական առանցքում Հայաստանի տնտեսական զարգացումներն են եղել: Փաշինյանը ամերկահայերին կոչ է արել տարվա մեջ գոնե մեկ ամիս ապրել Հայաստանում, դիմել ու ստանալ ՀՀ քաղաքացիություն, բնակարան գնել Հայաստանում: Կոչ է արել նաև բիզնես ունենալ Հայաստանում: Իսկ ամենակարևորը՝ ամուսնանալ հայաստանցի աղջիկների հետ:
Հայաստանի զարգացման հինգ կարևորագույն թիրախները մեկում՝ պետական կառավարման որակի բարձրացում: Բանաձևը վարչապետինն է, ինչի մասին նա Նյու Յորքում հայտարարեց:
Կառավարության հիմնական ջանքերն ուղղված են մարդկանց կյանքի որակը փոխելուն՝ ասաց:
Տնտեսությունը խնդիրներ չունի, զարգանում է։ Կառավարության ղեկավարի կանխատեսմամբ, տարին կփակենք մոտ 7 տոկոս տնտեսական աճով: Ակնկալում են, սակայն, ավելին՝ երկնիշ աճ: Այս դեպքում միայն բաց թողնվածը հետ վերադարձնելու հնարավորություն կլինի.
«Այսօր ՀՀ բյուջետային միջոցներով հնարավորություն կա այն ծավալների ճանապարհ կառուցել, որ վերջին անգամ եղել է այն ժամանակ, երբ Քըրք Քըրքորյանը նվիրել է: Կես տարում մոտ 120 մլն դոլարով բյուջեն գերակատարել ենք»:
Միջազգային պահուստներն են ավելացել, Փաշինյանի ձևակերպմամբ՝ աննախադեպ։ Գլխավոր դրամատունն էլ մեծ քանակությամբ արտարժույթ է գնել.
«Առաջին անգամ Հայաստանի պատմության մեջ ԿԲ 400 մլն դոլար է գնել շուկայից»:
Փաշինյանը խոսեց նաև գործազրկությունից, թափուր աշխատատեղերից ու արդյունաբերական գյուղատնտեսությունից: Հայտարարեց՝ նաև որակյալ մասնագետների լուրջ կարիք կա: Հիշեց «Ձյունիկ սառնարան»- ում հրդեհը, որտեղ մեծ քանակության սնունդ էր պահվում: Հարյուրավոր տոննաներով փչացած մսամթերքը պետք էր այլ վայր տեղափոխել. «Հնդկաստանի քաղաքացիները արեցին այդ աշխատանքը»:
Ամուսլարի մասին ԱՄՆ-ում արդեն երրորդ անգամ խոսեց կառավարության ղեկավարը՝ լիարժեք պետք է ազնիվ լինենք այդ հարցում՝ ինչպես մեր, այնպես էլ միջազգային հանրության հետ:
Ինչպես Լոս-Անջելեսում, այնպես էլ Նյու- Յորքում Փաշինյանը ամերիկահայերին կոչ արեց տարվա մեջ գոնե մեկ ամիս ապրել Հայաստանում, դիմել ու ստանալ ՀՀ քաղաքացիություն, բնակարան գնել Հայաստանում։ Կոչ է արեց նաև բիզնես ունենալ Հայաստանում:
Իսկ ամենակարևորը՝ ամուսնանալ հայաստանցի աղջիկների հետ:
Վարչապետի այցը կամփոփվի ՄԱԿ-ի Գլխավոր ասամբլեայում ելույթով: Այն նախատեսված էայսօր՝ Նյու Յորքում ժամը 20:00-ին (Երեւանի ժամանակով առավոտյան ժամը 04:00-ին):
