Աիդա Ավետիսյան
«Ռադիոլուր»
Ավան-Առինջ առաջին թաղամասի հենապատից տարիներ շարունակ հոսող կոյուղաջրի հարցը լուծվել է։ «Ռադիոլուրի» ահազանգից հետո պատկան մարմինները հետամուտ են եղել արդեն 20 տարվա խնդրի կարգավորմանը: Աիդա Ավետիսյանը այսօր կրկին այն թաղամասում էր, որտեղ մի քանի շաբաթ առաջ նրան բերել էր երեւանցիների բողոքը։
Ավան-Առինջում կեղտաջրերի մոտ 20 տարվա խնդիրը լուծվեց 10 օրվա ընթացքում: «Ռադիոլուրն» էր լսել բնակիչների ահազանգն ու տեղում տեսել վիճակը: Առաջին թաղամասը երկրորդից բաժանող հենապատից հոսող կեղտաջրերը ողողել էին Առինջի ամբողջ առաջին թաղամասը, իսկ գարշահոտությունը լցվում էր բնակիչների բնակարաններ:
Խնդրին տրվում էր ժամանակավոր լուծում, քանի որ գլխավոր դիտահորի վրա կառուցվել էին ավտոտնակներ և «Վեոլիա ջրի» աշխատակիցները չէին կարողանում մաքրել գլխավոր հորը: Սակայն այսօր պատկերը լրիվ այլ էր:
«Վերևը ավտոտնակներ քանդեցին, հորը բացեցին, մաքրեցին: Բավականին վատ վիճակում էր: Այդ կեղտաջրերը հոսում էին՝ հասնելով մինչև Հարսնաքար։ Խոլերայի բուն էր, ինչ հիվանդություն ասես կարող էր լինել: Ջուրը դադարել է, իսկ ժողովուրդն արդեն կարոտում է Հեղնար աղբյուրին»,- ծիծաղով նշում են բնակիչները:
Մինչ խնդրի լուծումը՝ Ավան վարչական շրջանի ղեկավարի աշխատակազմում պնդում էին, որ հասցեատերը Վեոլիա ջուրն է, «Վեոլիա ջրից» ասում էին՝ դա մեծ ծախսեր է պահանջում եւ թաղապետարանը պետք է լուծի։ Ի վերջո՝ խնդիրը լուծեց Երեւանի քաղաքապետարանը։ Կոմունալ տնտեսության վարչության պետ Արարատ Խաչիկյանը մեզ հետ զրույցում ասաց, որ ապամոնտաժվել են գլխավոր դիտահորի վրա կառուցված ապօրինի ավտոտնակները:
«Աշխատանքները վերջացրել ենք և ավտոտնակներն իրենց տեղում չի դրվելու, բայց մարդիկ կարող են օգտագործել այդ տարածքը: Նրանք, ովքեր կառուցել էին ավտոտնակները, կարող են իրենց մեքենաները կանգնեցնել»։
Արարատ Խաչիկյանը պնդում է, այդ տարածքում շինություններ այլեւս չեն կարող կառուցվել, որովհետեւ դա խանգարում է կոյուղագծի շահագործմանը։
