Տավուշի մարզի սահմանամերձ համայնքներում կարմիր խաչի միջազգային կոմիտեն 2014 թվականից սկսած պաշտպանիչ պատեր ու ապահով սենյակներ է կառուցում դպրոցներում ու մանկապարտեզներում:
Վազաշենի դպրոցը հաճախ է գտնվում թշնամու թիրախում: Դպրոցը հենակետի դեմ-դիմաց է: Վերջին կրակոցները սեպտեմբերի սկզբին են եղել:
Տավուշի մարզի սահմանամերձ համայնքներում թե մեծի, և թե փոքրի ականջին անսովոր չէ կրակոցի ձայնը: Թշնամու դիրքերից կրակոցներ կարող են լինել օրվա տարբեր ժամերին, շատ անսպասելի: Վազաշենի դպրոցը թշնամու թիրախներից մեկն է, գտնվում է հենակետի դիմաց:
Վերջին կրակոցները դպրոցի ուղղությամբ սեպտեմբերի առաջին օրերին են եղել: Կրակոցների հետևանքով պատուհաններ են կոտրվել, գույք վնասվել, բարեբախտաբար երեխաները դպրոցում չեն եղել:
Սահմանի ուղղությամբ գտնվող դպրոցի պատերին անհաշվելի են կրակոցների հետքերը: Իրենք լավ են տարբերում թշնամու կիրառած զինտեխնիկայի միջոցները:
Վազաշենի դպրոցում դասերն անվտանգ կազմակերպելու նպատակով կարմիր խաչի միջազգային կոմիտեի օգնությամբ երկհարկանի դպրոցի արևելյան կողմի պատուհանների մի մասը նեղացվել է, քարով շարվել: Դրանից հետո էլ է թիրախ դարձել: Այս անգամ փամփուշտները չեն թափանցել դպրոցի պատուհաններից ներս, կպել են պատին:
Կարմիր խաչի միջազգային կոմիտեն Տավուշի մարզի սահմանամերձ համայնքների ներսում՝ թշնամու դիրքից դիտարկվող ճանապարհներին, մանկապարտեզներում և դպրոցներում կառուցում է պաշտպանիչ պատեր և ապաստարաններ: Վազաշենի դպրոցի երեխաներն արդեն գիտեն ինչ պետք է անեն, եթե թշնամին նորից կրակի գյուղի ուղղությամբ:
Կարմիր խաչի միջազգային կոմիտեի միջոցներով պաշտպանիչ պատեր և ապաստարաններ են կառուցվել Այգեպարում, Պառավաքարում, Մովսեսում, Կոթիում: Կարմիր խաչի միջազգային կոմիտեի պաշտպանական և տնտեսական ապահովության բաժնի աշխատակից Արմեն Քարամյանը նշեց, որ մինչև օրս կառուցել են պաշտպանիչ 8 կառույց՝ ներառյալ ապահով սենյակներն և պաշտպանիչ պատերը:
Ապաստարանները հիմնականում նկուղային հարկերում են, ապահովված՝ ելքի ու մուտքի դռներով: Դրանք վերանորոգված են, լուսավոր, որտեղ տեղադրված են երկար նստարաններ:
