Նորարարական լուծումներով դրամապանակ, որը, ինչպես մտահղացման հեղինակներն են վստահեցնում, անհնար է կորցնել: Հայկական Volterman խելացի դրամապանակի մտահղացման հեղինակները օնլայն տիրույթում արդեն 8 հազար դրամապանակի նախավաճառք են իրականացրել: Պատվերները հասցեատերերին կհասնեն դեկտեմբերին: Այդ ընթացքում ստարտափի ներկայացուցիչները մտահղացումից կանցնեն արտադրության փուլ: Ամիսներ առաջ ստարտափի զարգացման համար դրամահավաք էր սկսվել: Դրա արդյունքում պահանջվող գումարից տասնապատիկ ավելի գումար է հավաքվել՝ ավելի քան 1 միլիոն դոլար: Հավաքված գումարի տնօրինման ու ապագա ծրագրերի մասին է «Ռադիոլուր»-ի անդրադարձը:
«Դրամապանականի միջոցով հնարավոր է լիցքավորել հեռախոսը, ունենալ ինտերնետ՝ աշխարհի ցանկացած կետում: Դրամապանակը կորցնելիս՝ հնարավոր է այն գտնել քարտեզի միջոցով՝ լուծված է տեղորոշման խնդիրը: Իսկ երբ ինչ- որ տեղ մոռացել եք հեռախոսը, դրամապանակը ազդանշան է տալիս, որ այն մոռացել եք: Ամենակարևորը փոքր տեսախցիկն է, որն ակտիվանում է, առաջին բացողի դիմնակարը ֆիքսվում է ու նկարն ուղարկում հեռախոսին:
Իսկ ամեն ինչ սկսվեց, երբ Wolterman-ի հիմնադիր Ազատ Թովմասյանը դրամապանակը կորցրեց: Մոտ երկու տարի թիմով աշխատեցին ու որոշեցին շուկա մտնել հայ շարքային սպառողին առայժմ ոչ այնքան հայտնի տարբերակով՝ Քրաութ ֆանդինգ –ով: Մեկնարկը տրվեց հունիսի 27-ին: Սա միջազգային հարթակ է, որտեղ այս կամ այն ընկերությունը ներկայացնում է իր առաջարկն ու հայտարարում, որ ծրագրի իրականացման համար կոնկրետ գումար է հարկավոր: Մարդիկ գումար են ներդնում և ստանում ընկերության պրոդուկդտը: Հավաքվել է ավելի քան 1 մլն դոլար:
«Գումարը կծախսենք միայն դրամապանակի արտադրման, ժամանակին առաքման ուղղությամբ: 8 հազար վաճառված դրամապանակ կա, դրանք պետք է արտադրել»:
Երեք տարբեր չափսերի դրամապանակներից ամենամեծ պահանջարկն ունի միջինը՝ այս պահին այն վաճառվում է 149 դոլարով, չնայած սկզբում 119 դոլար արժեր: Ազատ Թովմասյանն ասում է, որ դրամապանակի իրական արժեքը 238 դոլար է, զեղչերով են սկսել: Սա էլ մարկետինգային ու PR մոտեցում է: Դեկտեմբերին նախապես պատվիրված դրամապանակները կառաքեն, հետո արդեն՝ 2018-ից դրանք կվճառավեն նաև Հայաստանյան խանութներում, օնլայն հարթակն իհարկե նորից ակտիվ կլինի
«Աջակցում եմ հայկական հերթական start-up-ին։ Ամրագրեցի իմ Volterman սմարթ դրամապանակը»:
Նման գրառում ֆեյսբուքյան իր էջում վերջերս կատարել էր վարչապետ Կարեն Կարապետյանը: Նա արդեն գնել է: Երբ Ազատ Թովմասյանից հարցրեցինք՝ այլ պաշտոնյաների նույնպես դրամապանակը հետաքրքե՞լ է, արձագանքեց.
«Մենք գիտենք իրենց անուն ազգանուններով, հասցեներով, բայց տեղեկացված չենք պաշտոնյա՞ են , թե՞ ոչ»:
Հայ սպառողը Հայաստանում կկարողանա Volterman-ը ձեռք բերել արդեն 2018-ի հունվարից: Այս պահին ավելի քան 120 երկրներում հետաքրքրվում են՝ առաջատարը ԱՄՆ է, երկրորդ տեղում Ավստրալիան, երրորդում՝ Միացյալ Թագավորություն: Նախավաճառքի ծավալով Հայաստանը 7-րդ տեղում է: Առաջիկա երեք տարվա ծրագրերը արդեն պատրաստ են՝ քննարկման փուլում են նաև այլ սմարթ սարքեր: Ազատ Թովմասյանը փակագծերն ամբողջությամբ չի բացում, սակայն նշում է՝ առօրյա օգտագործման են լինելու՝ դրամապանակների կանանց համար նախատեսված տարբերակներ, ճամփորդական պայուսակներ՝ նույն ֆունկցիաներով:
