Մշակույթ

«Ոսկե ծիրան»- ում այս տարի կներկայացվի ֆրանսիական նոր կինոն եւ շեքսպիրյան ծրագիրը

alisagevorgyan

«Ոսկե ծիրան» միջազգային կինոփառատոնի  կազմակերպիչներն այսօր ներկայացրել են այն ծրագրերը, որոնք ավանդաբար իրականացվում են  ՀՀ- ում օտարերկրյա առաքելությունների հետ: Ֆրանսիական, ռուսական, գերմանական լավագույն ֆիլմերն այս տարի ևս երևանյան հանդիսատեսի  ուշադրության կենտրոնում կհայտնվեն: Փառատոնի օրերին Մեծ Բրիտանիան այս տարի կներկայանա շեքսպիրյան բացառիկ ծրագրով:

 

ՀՀ-ում Ֆրանսիայի դեսպանատան հետ արդեն ավանդական դարձած  համագործակցության շնորհիվ այս տարի ևս «Ոսկե ծիրանի» շրջանակներում կիրականացվի համատեղ նախաձեռնություն: «Ֆրանսիական նոր կինո» ծրագրի շրջանակներում կցուցադրվեն վերջին շրջանում նկարահանված ֆրանսիական լավագույն ֆիլմեր: Կինոծրագրի բացումը կկայանա  2015-ին նկարահանված Պիեռ Լեոնի «Երկու, Ռեմի, երկու» ֆիլմով:

Միջազգային խաղարկային մրցույթում ներառված է  Միա Հանսեն –Լյովեի «Գալիք» ֆիլմը՝ Իզաբել  Յուպերի  դերակատարմամբ: Փառատոնի օրերին ընդհանուր առմամբ կներկայացվեն 12 ֆրանսիական ֆիլմեր՝ խաղարկային և վավերագրական: ՀՀ-ում  Ֆրանսիայի դեսպանության ժամանակավոր  հավատարմատար  Նիկոլաս Ֆեյի խոսքով՝ ֆրանսիացիների համար մեծ հաճույք է մասնակցել «Ոսկե ծիրան» կինոփառատոնին, որը համախմբում է կինոյի սիրահարներին հայկական ծիրանի անգնահատելի բույրով համեմված մթնոլորտում։

ՀՀ- ում Գերմանիայի դեսպանատան և  Գյոթեի ինստիտուտի հետ համատեղ «Ոսկե ծիրան»- ի շրջանակներում կիրականացվի նաև գերմանական կինոծրագիր: ՀՀ-ում Գերմանիայի Դաշնային Հանրապետության  արտակարգ և լիազոր դեսպան  Մաթիաս Քիսլերի տեղեկացմամբ կցուցադրվեն «Բեռլինալեի» մրցութային ծրագրում ընդգրկված  «24 շաբաթ», ինչպես նաև Կաննի կինոփառատոնում  ՖԻՊՐԵՍՍԻ ժյուրիի մրցանակին արժանացած «Թոնի Էրդման» ֆիլմերը:  Կներկայացվի գերմանահունգարացի ռեժիսոր և օպերատոր  Ֆրեդ Քելեմենի  ֆիլմերի հետահայաց ցուցադրություն:

Հայաստանում Բրիտանական խորհրդի հետ համատեղ «Ոսկե ծիրան» կինոփառատոնն այս տարի կներկայացնի «Շեքսպիրն ապրում է կինոյում» ծրագիրը՝ նվիրված անգլիացի հռչակավոր գրողի  մահվան 400-րդ տարելիցին:  Ծրագրի շրջանակներում կցուցադրվեն   Շեքսպիրի ստեղծագործությունների  հիման վրա նկարահանված  լավագույն կինեմատոգրաֆիական աշխատանքները:

«Լեհական կինոյի օր» ծրագրի շրջանակներում կցուցադրվի  Լոկառնոյի կինոփառատոնում  լավագույն ռեժիսուրայի համար մրցանակ ստացած  Անջեյ Ժուլավսկու  «Կոսմոս» ֆիլմը: Փառատոնի տարբեր մրցութային ծրագրերում այս տարի ևս ընդգրկված են ռուսական արտադրության ֆիլմեր: «Ոսկե ծիրանն» այս տարի ակտիվորեն կլուսաբանի ռուսական «Մշակույթ» հեռուստաալիքը:

«Ոսկե ծիրան» կինոփառատոնը կմեկնարկի  հուլիսի 10-ին՝ «Զարեհ» ֆիլմով՝ «Մոսկվա» կինոթատրոնում: «Սա քրդական թեմայով առաջին ֆիլմն է, որին անդրադարձել է հայ կինոն դեռ 90 տարի առաջ»,- ասում է փառատոնի գեղարվեստական տնօրեն  Սուսաննա Հարությունյանը։

Ոսկե ծիրանն անպայման կանդրադառնա նաեւ իրանցի աշխարհահռչակ ռեժիսոր, սցենարիստ և պրոդյուսեր Աբաս Քիառոստամին, ով  օրերս հեռացել է կյանքից: Կցուցադրվի  նրա ֆիլմերից որևէ մեկը: Նշենք, որ Քիառոստամին երևանյան փառատոնի լավագույն  բարեկամներից էր։

 

Back to top button