Ամռան շոգ ամիսներին մեծանում է սննդային թունավորումների հավանականությունը։ Մասնագետներն ամեն տարի ներկայացնում են իրենց խորհուրդները, հորդորում հնարավորինս ականջալուր լինել դրանց: Սննդաբանի խորհուրդն է հեռու մնալ արագ սննդի կետերից, գաստրոէնտերոլգը հորդորում է պտուղ-բանջարեղենն էլ կիրառել սահմանափակ, քանի որ դրանք հագեցած են քիմիական նյութերով, քնաբանի խորհուրդն է արտերկիր մեկնողներին ուշադիր լինել ժամային գոտիների նկատմամբ:
Սննդային թունավորումների վտանգը մեծանում է հատկապես ամռան ամիսներին: Առողջապահության ոլորտի մասնագետները հորդորում են ուշադիր լինել փողոցային առևտրի և արագ սննդի կետերից, քանի որ այսօրինակ վայրերում չեն պահպանվում հիգիենայի կանոնները, իսկ խիստ անհրաժեշտության դեպքում օգտվել այն կետերից, որտեղ սնունդը ներկայացված է փակ վիճակով, և մարդկանց շարժ է նկատվում: Նման դեպքերում հին կերակուր չի կարող մնալ, հավելեց սննդաբան Հասմիկ Աբովյանը: Ս
ննդային թունավորումներից խուսափելու համար անհրաժեշտ է առաջին հերթին պահպանել սննդի և անձնական հիգիենայի կանոնները, լավ եփել մսամթերքը, խուսափել սալաթներից, իրար չխառնել կերակուրները: Արտերկիր մեկնող քաղաքացիներին էլ հորդորեց հետևել տվյալ երկրի կողմից առաջակվող ճաշացանկին և զգուշանալ իրենց համար անսովոր ուտեստներից:
էկզոտիկ կերակուրների գայթակղությանը չդիմացողներին Հասմիկ Աբովյանը հորդորեց սկզբում փորձել փոքր մասնաբաժնով: Հիգիենայի նորմերի պահպանման, փողոցային առևտրից ու սննդի կետերից օգտվելու նորմերի խախտումներին հետևելուց զատ, պետք է ուշադիր լինել նաև պտուղ-բանջարեղենների օգտագործման հարցում ևս: Դրանք էլ հագեցած են տարբեր պարարտանյութերով: Գաստրոէնտերոլոգ Աննա Մարտիրոսյանը զգուշացնում է՝ գրանցվում են ձմերուկի թունավորման շատ դեպքեր, իսկ դրանցից խուսափելու համար խորհուրդ է տրվում օգտագործելուց առաջ կեղևը լվանալ հոսող ջրի տակ: Ձմերուկը հաճախ լինում է արհեստական աճեցված, ուստի հղի կանանց և երեխաներին խորհուրդ է տրվում շատ չօգտագործել։
Իսկ քնաբան-նյարդաբան Սամսոն Խաչատրյանի խորհրդով՝ շոգ ամռանը պետք է զերծ մնալ արևի ուղիղ ճառագայթների տակ գտնվելուց և զգուշանալ ջրազրկվելուց: Օրգանիզմի նյութափոխանակությունը կարգավորելու համար անհրաժեշտ է օգտագործել շատ ջուր:
Շոգն իր բացասական ազդեցությունն է ունենում նաև քնի վրա: Իսկ այս պարագայում ննջասենյակի ջերմաստիճանը կարևոր է, ասում է քնաբանը: Ճանապարհորդության մեկնողներին էլ հորդորում է ընտրել ժամային գոտիներով մեզանից քիչ տարբերություն ունեցող երկրներ: Ամառը պարտադրում է իր սննդակարգը, իսկ դրան ականջալուր քաղաքացիները հնարավորիս կձերբազատվեն սննդային թունավորումներից:
