Գառնեցիները Ազատ գետի համար ազատություն են պահանջում (լրացված)

տեղադրվել է ժամը  16։50-ին
լրացվել է ժամը

Քաղցրաշենի նոր ոռոգման համակարգը ե՛ւ հոսանք կխնայի, ե՛ւ նոր տարածքներ կջրի, լրագրողների հետ զրույցում ասաց ՀՀ գյուխնախարարության Ջրային տնտեսության պետական կոմիտեի «Ջրային տնտեսության ԾԻԳ»-ի բնապահպանության մասնագետ Մարտիրոս Նալբանդյանը՝ Քաղցրաշենի ինքնահոս ոռոգման համակարգին նվիրված հերթական լսումների ընթացքում: Ի դեպ՝ լսումները այսօր դարձյալ անցել են թեժ մթնոլորտում: Գյուղացիների մի մասը բողոքի ակցիա է իրականցրել Գառնի մշակույթի պալատի դիմաց՝ չցանկանալով լսել մասնագետներին,մյուս մասն էլ ներս է  մտել,բայց դրսում գտնվող գյուղացիների կողմից ստացել «դավաճան»  որակումը:  Քննարկմանը ներկա են եղել Ջրային պետական կոմիտեի նախագահ Արամ  Հարությունյանը և Կոտայքի մարզպետ Կարապետ Գուլոյանը:

 

«Ներս մտեք,ու ասեք ձեր պահանջները, ասեք, որ մենք մեր ջուրը չենք տա, ձեր խոսքը ասեք»,- Գառնիի գյուղապետ Աշոտ Վարդանյանը գյուղացիներին հորդորում էր մտնել Մշակույթի տուն ու մասնակից դառնալ  հանրային լսումներին և ներկայացնել իրենց փաստարկները, թե ի՞նչու չեն ցանկանում,որ  կառուցվի Քաղցրաշենի նոր ոռոգման համակարգը:

Սակայն  գյուղացիների մի մասը գերադասեց  մնալ դրսում, իսկ մյուս մասը, որ ցանկանում էր լսել պատասխանատուների փաստարկները, մտան Գառնի համայնքի Մշակույթի տուն, որտեղ և տեղի  էին ունենում հանրային լսումները:

Բայց  քննարկմանը մասնակցել ցանկացողներին դրսում կանգնածները պիտակավորում էին:  Ստեղծվեց տհաճ իրավիճակ: Իսկ ներս մտնող գյուղացիները պարզապես ցանկանում էին  ստանալ  իրենց մտահոգող հարցերի պատասխանները, արդյո՞ք  այս նոր համակարգի կառուցումով Ազատ գետը կցամաքի,արդյո՞ք Գառնին  չի  ունենա ոռոգման ջրի խնդիր, և այլն:

Արդեն ներսում Ջրային տնտեսության ԾԻԳ- ի բնապահպանության մասնագետ Մարտիրոս Նալբանդյանը հայտարարեց,որ գյուղացիները  զուր են մտահոգվում, որ  Ազատ գետը կցամաքի, քանի որ Քաղցրաշենի նոր ոռոգման համակարգը ե՛ւ հոսանք կխնայի, ե՛ւ նոր տարածքներ կջրի:

Նշենք,որ  այժմ Արտաշատի շրջակայքի 12 գյուղական համայնքների հողատարածքները ոռոգվում են պոմպերով (Ազատի ջրամբարից՝ Քաղցրաշենի պոմպակայանով): Մեխանիկական ոռոգումը չի ծածկում նշված համայնքների ողջ պահանջը. 1230 հա- ից ոռոգվում է միայն շուրջ 850-ը: Նոր ինքնահոս համակարգը թույլ կտա խնայել տարեկան 500 մլն դրամ (պոմպի էներգիայի ծախսը) և ընդլայնել ոռոգվող տարածքները:

Մարտիրոս Նալբանդյանը նշում է, որ սպառվելու է այնքան ջուր, որքան նախկինում,  եւ Ազատ գետի ցամաքելու վտանգ չի ստեղծվում: Համակարգը կառուցվել է այնպես, որ գետում կպահպանվի 850 լ/վրկ-ից ոչ պակաս հոսք: Համակարգի մուտքը նախագծված է այնպիսի բարձրությամբ,  որ եթե գետի մակարդակը լինի նախատեսվածից ցածր, ջուրը համակարգ չի մտնի:

Ջրային պետական կոմիտեի նախագահ Արամ Հարությունյանն էլ  նշեց, որ այս ծրագիրը բավականին երկար ճանապարհ ու բազմաթիվ փորձաքննություններ է անցել։

Հիշեցրեց՝ դեռ  մեկ  շաբաթ առաջ դարձյալ քննարկումներ են եղել, որի ժամանակ առաջ էին եկել  մի շարք հարցեր, որոնք  մնացել էին անպատասխան: Բայց  մեկ շաբաթ անց անկախ  փորձագետներով եկել են, որ բոլոր հարցերի պատասխաները տան, ,սակայն գյուղացիները չեն ցանկանում լսել ու երկխոսություն մեջ մտնել։

«Այն ջուրը, որը անհրաժեշտ  է որպեսզի  գետում լինի, այդ թողքը ապահովելու է ավտոմատ եղանակով, ու բացառված է, որ գետը ցամաքեցնելու միջոցով   ջուր տեղափոխվի»,- շեշտեց Արամ Հարությունյանը։

Նշենք, որ ծրագիրը աջակցություն է նախատեսում նաեւ Գառնի համայնքին: Շուրջ 600 մլն դրամ կուղղվի Գառնիի մայր ջրանցքի և ներքին ցանցի նորոգմանը: Արդյունքում ջրի կորուստը կնվազի մոտ 35%-ով և կօգնի լրացուցիչ ոռոգել 280 հեկտար:

Սակայն գառնեցիները պնդում են՝ թույլ չեն տալու գյուղի կողքով անցնող Ազատ գետի հաշվին ոռոգել Արտաշատի մերձակա գյուղերը: «Արդեն մոտ 2 տարի կլինի, որ մենք պայքարում ենք Գառնիի կիրճում էկոհամակարգի ոչնչացման դեմ, քանի որ այդ ծրագրի իրականացման դեպքում մենք կորցնում ենք մեր գետը: Բացի դրանից, գյուղն ինքը ոռոգման շատ մեծ կարիք ունի, մարդիկ չեն կարողանում մշակել իրենց ցանքատարածությունները, այգիները»,- ասում է  Գառնի գյուղի բնակիչ Արուսյակ Կարապետյանը:

Ի դեպ  գյուղացիներն այս անգամ էլ փակեցին գյուղի ճանապարհը՝ ասելով, որ չեն պատրաստվում թույլ տալ տեղափոխել Ազատ գետի ջուրը։