Տնտեսագետ Վահագն Խաչատրյանի կարծիքով՝ առևտրի մեջ սահմաններ չպետք է լինեն։ Սա արգելել թուրքական ապրանքները Հայաստանում հարցի նրա պատասխանն է։ Վահագն Խաչատրյանը հույս ունի, որ նման «խելացնոր որոշում» չի կայացվի: Կոնկրետ Թուրքիայի դեպքում տնտեսագետը նաև քաղաքական տարրեր է տեսնում՝ այս խնդրի լուծումը թողնելով պետությանը: «Այլընտրանք» հետազոտական կենտրոնի տնօրեն Թաթուլ Մանասերյանը պնդում է՝ հատկապես տեքստիլի մասով հայկական արտադրանքը կարող է փոխարինել թուրքականին, պարզապես պետք է ճիշտ հարկային քաղաքականություն վարել:
Արգելել թուրքական արտադրանքը ՀՀ- ում, թե՝ ոչ: Այս օրերին ԶԼՄ-ների ու հատկապես տնտեսագետների քննարկման կենտրոնում այս հարցն է: Այն, որ հայկական շուկան թուրքական արտադրանքով է ողողված, գաղտնիք չէ: Այդ երկրից Հայաստան է ներմուծվում 570 անուն ապրանք: Ցանկում սննդամթերքն է, հագուստը ու… ոչ միայն:
Տնտեսագետ Աշոտ Խուրշուդյանը նկատում է՝ 2015-ին արդեն իսկ թուրքական ապրանքների ներմուծումը նվազել է, այժմ արդեն Հայաստան ավելի շատ իրանական ապրանքներ են ներմուծվում, քան՝ թուրքական: «Արգելելով թուրքական ապրանքերի մուտքը՝ ավելի շատ փակվում է ապագա հնարավորությունները և ոչ թե ներկա տնտեսական իրավիճակը»,- կարծում է տնտեսագետը:
«Այլընտրանք» հետազոտական կենտրոնի տնօրեն Թաթուլ Մանասերյանն էլ նկատում է ՝ Հայաստան ավելի շատ թուրքական ապրանք է ներմուծվում, քան այստեղից արտահանվում է: Տնտեսագետը պնդում է՝ հատկապես տեքստիլի մասով հայկական արտադրանքը կարող է փոխարինել թուրքականին: Պարզապես պետք է ճիշտ հարկային քաղաքականություն վարել:
«Բարեբախտաբար հայ սպառողն ունի ընտրության լայն հնարավորություն, ասում է տնտեսագետ Վահագն Խաչատրյանն ու նկատում,- այն, որ հայկական շուկան ողողված է թուրքական արտադրանքով, սա միայն հայ գործարարների ռիսկով է պայմանավորված: Նրանք են շուկան հայտնաբերել, սկսել ներմուծումը: Եթե այլընտրանք լիներ, կարելի էր ապրանք ներկրել ԵՏՄ երկրներից և ոչ թե Թուրքիայից»,- ասում է Խաչատրյանը:
Առևտրի համար ընդհանրապես սահմաններ չպետք է լինեն՝ հայտարարում է տնտեսագետը՝ միաժամանակ ընդգծելով ՝ այստեղ առկա է քաղաքական հանգամանքը, իսկ սա պետության խնդիրն է:
Տնտեսագետ Աշոտ Խուրշուդյանն անձամբ թուրքական արտադրանք չի գնում, բայց և չի մեղադրում նրանց, ովքեր դրանք գնում են: Նույն սկզբունքով նաև սպառողների միության նախագահ Արմեն Պողոսյանն է առաջնորդվում՝ առաջարկելով արգելելու փոխարեն այլընտրանքային լուծումներ գտնել։
Արգելելով թուրքական արտադրանքի մուտքը՝ լուրջ խնդիրների ադջև կկանգնեն հատկապես ՓՄՁ ներկայացուցիչները՝ ասում է տնտեսագետ Վահագն Խաչատրյանն ու հույս հայտնում, որ նման, իր ձևակերպմամբ, «խելացնոր որոշում» չի կայացվի:
