«Իսլամական պետություն» ահաբեկչական խմբավորման կողմից գերեվարված ու հրաշքով վերապրած ազգությամբ եզդի Նադիա Մուրադի միակ երազանքն է, որ այլևս ոչ ոք չզգա այն, ինչ ինքն է զգացել: «Ընդդեմ ցեղասպանության հանցագործության» գլոբալ ֆորումին մասնակցելու նպատակով Հայաստան ժամանած մարդու իրավունքների եզդի պաշտպանը լրագրողների հետ հանդիպմանն այսօր պատմել է այն դժոխքի մասին, որով անցել է 1.5 տարի առաջ: Գերությունից նա կարողացել է փախչել բարի մարդկանց շնորհիվ: Նադիա Մուրադը եզակի եզդի կին գործիչներից է, որ Իրաքի եզդիների ցեղասպանության հարցը բարձրաձայնել է ամբողջ աշխարհով: Նա ելույթ է ունեցել ՄԱԿ-ում և հանդիպումներ ունեցել մի շարք երկների առաջնորդների հետ` ներկայացնելով 2014 թվականին եզդիների հետ տեղի ունեցածը:
Նադիա Մուրադը հազարավոր եզդի կանանց հետ գերեվարվեց ԴԱԻՇ-ի կողմից Իրաքի հյուսիսում գտնվող եզդիաբնակ Շանգալի գրավման ժամանակ: Իսլամական պետության զինյալները սպանել են նրա վեց եղբայրներին: Նադիան կորցրել է նաև մորը, եղբայրների չորս կանանց ու նրանց վեց երեխաներին: «Ես ապրում էի Շանգալի Քոչու եզդիաբնակ գյուղում: Երկու ժամվա ընթացքում իսլամիստները սպանեցի մեր գյուղի 700 տղամարդկանց: Պայթեցրեցին մեր սրբավայրերը: 4-12 տարեկան երեխաներին մայրերից պոկելով տանում էին իրենց հետ, որպեսզի օգտագործեն որպես զինվորներ: Եզդի կանանց ու աղջիկներին գերևարեցին ու տարան Թելաֆար: Շանգալում իսլամիստները սպանեցին հազարավոր եզդի տղամարդկանց, 6000 կանանց առևանգեցին»,-պատմում է Նադիա Մուրադը:
Գերությունից Նադիային հաջողվել է փախչել, հասել է մինչև Զախո քաղաք, որտեղից էլ հետո տեղափոխվել Գերմանիա: «Ոմանք փախել են իսլամիստներից , որոշ կանանց հաջողվել է գնել նրանցից, բայց մինչ օրս շուրջ 3500 եզդի կանայք գտնվում են իսլամական պետության գրոհայինների ձեռքում: Նրանց ձեռքում է Շանգալի շուրջ 40 տոկոսը: Այդ տարածքներում հազարավոր եզդիների դիակներ կային, պարզապես արևի տակ թափված: 1.5 տարի անց նրանց ոսկորներն անգամ դժվար է գտնել»,-ասում է Նադիան:
Նադիա Մուրադը եզակի եզդի կին գործիչներից է, որ Իրաքի եզդիների ցեղասպանության հարցը բարձրաձայնել է տարբեր ամբիոններում: Նա ելույթ է ունեցել ՄԱԿ-ում և հանդիպումներ ունեցել մի շարք երկների առաջնորդների հետ` ներկայացնելով 2014 թվականին եզդիների հետ տեղի ունեցածը: Իր ժողովրդին պատուհասած աղետի մասին Նադիան պատմեց նաև երեկ՝ «Ընդդեմ ցեղասպանության հանցագործության» գլոբալ ֆորումի մասնակիցներին: Երևանյան մի շարք հանդիպումների, այդ թվում և պաշտոնատար անձանց հետ, Նադիան այսօր կիսվեց իր ջերմ տպավորություններով ու երախտագիտությամբ:
Նադյա Մուրադին ցավ է պատճառում այն հանգամանքը, որ աշխարհն անտարբեր է այնպիսի ողբերգության նկատմամբ, ինչպիսին մի ողջ ազգի ոչնչացումն է: Նա համոզված է՝ իր ժողովուրդը չէր ապրի ցեղասպանության ցավը, եթե աշխարհը ժամանակին ճանաչեր ու դատապարտեր հայերի ցեղասպանությունը:
