Այժմ նոր դինամիկա կա Լեռնային Ղարաբաղի հակամարտությանը խաղաղ ու վերջնական կարգավորում տալու գործընթացում, բայց դրա համար հրադադար պետք է պահպանել երկու կողմերում էլ, այսօր հայտարարել է Հայաստանում Գերմանիայի արտակարգ եւ լիազոր դեսպան Մաթիաս Քիսլերը` պատասխանելով «Ռադիոլուր»-ի հարցին, թե ժամանակը չէ՞ արդյոք հանել ԼՂ հակամարտության կողմերի միջեւ դրվող հավասարության նշանը` տարբերակելով խաղաղ բնակչությանը սպանող ու զինվորների դիերը խոշտանգող ագրեսորին սեփական հողերի համար պայքարողից: Դեսպանը խոսել է նաեւ Գերմանիայի կողմից շրջանառության մեջ դրված ԼՂ խնդրի կարգավորմանն ուղղված նոր փաստաթղթի մասին:
Գերմանիան, որպես ԵԱՀԿ նախագահող երկիր, արդյոք ժամանակը չի համարում արցախյան հակամարտության հարցում հանել հավասարության նշանը հայկական եւ ադրբեջանական կողմերի մեջտեղից. հարց ուղղեց «Ռադիոլուրը» Հայաստանում Գերմանիայի արտակարգ եւ լիազոր դեսպան Մաթիաս Քիսլերին` միաժամանակ հետաքրքրվելով` ի վերջո ճիշտ չէ՞ դիտարկել Ադրբեջանը որպես ագրեսոր երկիր, որը սպանում է խաղաղ բնակչությանը եւ գլխատում զինվորներին ու խոշտանգում նրանց դիերը, ինչը փաստ է եւ ինչը ռազմական հանցագործություն է:«Հայկական կողմի վերջին զեկույցները զինվորների մարմինների խոշտանգման դեպքերի մասին ի գիտություն ենք ընդունել»,- ասաց դեսպանը: Մենք որպես ԵԱՀԿ նախագահող երկիր ուշադրությամբ հետեւում ենք իրադարձություններին, բայց այս պահին դեռ չենք կարող հստակ ասել, թե հետագա քայլերի ինչ մեխանիզմներ կան: Գերմանական կողմի անտարբեր դիրքորոշման մասին հարցին ի պատասխան դեսպանը խորհուրդ է տալիս սպասել, բացատրում, թե ԵԱՀԿ Մինսկի խումբը շարունակում է քննարկումները` խնդիրը խաղաղ հուն վերադարձնելու ուղղությամբ:
«Վերջին շաբաթվա ընթացքում իմ աշխատանքի ամենակարեւոր մասը հենց այս հարցով զեկուցումներն էին Բեռլին: Ռազմական գործողությունների վերսկսկումը, անշուշտ, հետքայլ է հակամարտության խաղաղ կարգավորմանն ուղղված ջանքերից: Գերմանիայի արտգործնախարար Շտայնմայերը, ով նաեւ ԵԱՀԿ նախագահն է, անհապաղ զանգ է տվել Հայաստան եւ Ադրբեջան` հորդորելով երկուստեք պահպանել զինադադարը»,- ասում է դեսպանը:
Արդյո՞ք երկու կողմերին ուղղված երկարատեւ ոչ հասցեական վերաբերմունքն ու չեզոք կոչերը չեն հենց ապրիլյան լարվածության հիմքում. հարց ուղղեցինք: «Ես այժմ ավելին ասել չեմ կարող, քան այն, որ, իմ պատկերացմամբ, այժմ նոր դինամիկա կա հակամարտությանը խաղաղ ու վերջնական կարգավորում տալու առումով: Բայց կրկնում եմ` դրա համար հրադադար պետք է պահպանել երկու կողմում էլ»:
Իսկ ինչու գերմանական կողմը չի կարեւորում արձանագրել, թե որ կողմն է եղել նախահարձակ ու ավելի հասցեական կոչերով դիմել հակամարտության կողմերին: Իրեն ուղղված կրկնվող հարցին ի պատասխան` Գերմանիայի դեսպանը նկատեց, թե ինքը դեռ հիմնավոր տեղեկություններ չունի` ինչպես են զարգացումներն ընթացել ապրիլի երկուսին: «Ասացի այն, ինչ պետք է ասեի: Մնացած եզրահանգումները թողնում եմ Մինսկի խմբի եռանախագահներին, որոնց մենք լիովին աջակցում ենք»,- շարունակեց դիվանագետը:
Հայաստանի նախագահի բեռլինյան վերջին այցի ընթացքում Գերմանիայի արտաքին գործերի նախարարը հայտարարեց, որ գոյություն ունի խնդրի կարգավորման ծրագիր` բաղկացած 7 կետից: Ինչ է սա ենթադրում, ու արդյոք այն դրված է Մինսկի խմբի քննարկումների հիմքում: «Այո, այդպիսի փաստաթուղթ կա: Սա ներքին փաստաթուղթ է, ու կրկնում եմ` հիմնադրույթներից մեկը զինադադարի պահպանումն է: Այս ծրագրում խնդրի վերջնական լուծման մասին խոսք չի գնում, դա բացառապես Մինսկի խմբի համանախագահներին է վերապահված: Իսկ արդյոք գերմանական փաստաթուղթը դրվել է հենց Մինսկի խմբի քննարկմանը, տեղյակ չեմ»:
Հիշեցնեմ, որ օրեր առաջ էլ Գերմանիայի արտակարգ եւ լիազոր դեսպան Մաթիաս Քիսլերը «Ռադիոլուր»-ի հետ բացառիկ հարցազրույցում շեշտել էր, որ ԵԱՀԿ նախագահությունն այս տարի ստանձնած Գերմանիան հետեւողականորեն առաջ է մղելու հայ-ադրբեջանական սահմանին եւ շփման գծում հրադադարի խախտման դեպքերի հետաքննության մեխանիզմի ներդրման նախաձեռնությունը:
