Ընտրական օրենսգրքի նախագիծը հրապարակվեց. քննարկումը կառավարության վաղվա նիստում

Ընտրական օրենսգրքի նախագիծը կքննարկվի կառավարության վաղվա նիստում.  Քիչ  առաջ   նախագիծը  տեղադրվել  է կառավարության կայքում: 200 էջանոց փաստաթուղթը, ըստ վարչապետի մամուլի քարտուղար Գոհար Պողոսյանի, ներառում է շահագրգիռ բոլոր գերատեսչությունների կողմից ներկայացված առաջարկները, լրամշակված է և  որոշակիորեն  տարբերվում է Վենետիկի հանձնաժողով ուղարկված տարբերակից:  Նախագծի բովանդակային քննարկումները կսկսվեն վաղը ՝ գործադիրի նիստից հետո:  Նոր օրենսգրքի ընդունման վերջնաժամկետը, ըստ փոփոխված Սահմանադրության անցումային դրույթների, հիշեցնենք, հունիսի 1-ն է: Մինչ ԱԺ  նիստերի դահլիճ հասնելը` նախագիծը  խորհրդարանական լսումների, հանրային լայն քննարկումների առարկա կդառնա՝ վստահեցնում են  իշխանության ներկայացուցիչները՝ այս կերպ պատասխանելով ընդդիմության այն մեղադրանքին, թե ընտրական օրենսգրքի մշակման   գործընթացն ուղեկցվել է «գաղտնիության» շղարշով:

 

Մեղադրանքը, թե  Ընտրական նոր օրենսգրքի մշակման աշխատանքներն ընթանում են դռնփակ, առանց քաղաքական ուժերի ու քաղհասրակության ներկայացուցիչների մասնակցության, խորհրդարանական մեծամասնության ներկայացուցիչները  հիմնավոր չեն համարում:  Առաջարկներ ներկայացելու փուլը դեռ առջևում է, ասում է պետաիրավական հարցերի մշտական հանձնաժողովի նախագահ Հովհաննես Սահակյանը:  «Այն աղմուկը, որ փորձում են բարձրացնել, մեղմ ասած, տեղին չէ։ Կարծում եմ՝ նաև  ազնիվ չէ։ Երբ նախագիծը հասնի Ազգային ժողով, բոլոր առաջարկները կարող են ներկայացվել»:

Հիմա պետաիրավական հանձնաժողովը մշակում է այն ժամանակացույցը, որով նախատեսում են կազմակերպել քննարկումները: Մինչև նիստերի դահլիճ հասնելը նախագիծը խորհրդարանական լսումների, հանրային լայն քննարկման առարկա կդառնա, բոլոր առաջարկները կքննարկվեն, վստահեցնում է պետաիրավական հարցերի մշտական հանձնաժողովի նախագահը:

Այդ վստահեցումները ,  միևնույն է, համոզիչ չեն  ընդդդմադիրների համար:  Մտահոգության առարկա հարցերի թվում է այն, թե ինչու է նախագիծը մինչև հրապարակվելն ուղարկվել Վենետիկի հանձնաժողով: ՀԱԿ-ից Լևոն Զուրաբյանը համոզված է, որ իշխանությունը պետք է հակառակն աներ: «Պետք է բանակցեր սեփական հանրության հետ, փորձեր գալ նախնական մի նախագծի և հետո այն ուղարկեր Վենետիկի հանձնաժողով»:

Զուրաբյանը  կարծում է, որ  Վենետիկի հանձնաժողովի հավանությունից հետո սկզբունքային փոփոխությունների մասին խոսելն այլեւս ավելորդ  կլինի:

Հանձանժողովի կարծիքը մեզ համար ոչ թե օրենք, այլ ուղեցույց է. այսպես է արձագանքում մտահոգությանը ՀՀԿ խմբակցության ղեկավար Վահրամ Բաղդասրայանը: «Վենետիկի հանձնաժողով ուղարկված նախագիծը և..և-երով, կամ..կամ-երով նախագիծ է: Այսինքն նույն հարցի մասին մի քանի տարբերակներ են  ուղարկվել: Հանձնաժողովի կարծիքը մեզ միայն կարող է ուղղություն տալ, ուղղորդել և ոչ թե պարտադիր լինել»:

Ըստ Բաղդասարյանի՝ այն հիմնարար մոտեցումները, որոնք ներդրվելու են  Ընտրական օրենսգրքի հիմքում, մանրակրկիտ և բազմակողմանի քննարկումներ են պահանջում։ Թե կոնկրետ որ մեխանիզմների մասին է խոսքը,  փակագծերն առայժմ չեն բացվում՝ դիտարկմամբ, թե բոլոր հարցերի պատասխանը կտա նախագիծը հրապարակվելուց հետո:

Մինչ այդ` քաղաքացիական հասարակությունն ու քաղաքական ընդդիմադիր ուժերը փորձում են համատեղել իրենց դիրքորոշումները և հանդես գալ առաջարկների միասնական փաթեթով: Այս միտքը հնչեց  օրերս կազմակերպված հանրային  քննարկման ժամանակ՝ պետք է առնվազն առանցաքային 3-4 հարցերի շուրջ միասնական, կոնսոլիդացված պահանջ ձևակերպել և պնդել դրանց ընդունումը:

Առաջարկը կարծես ընդունելի է ընդդիմադիր  ուժերից շատերի  համար, «Ժառանգությունից» Ռուբեն Հակոբյանը, սակայն, ուշադրություն է հրավիրում մի փաստի վրա:  «Եթե ուշադրություն դարձրել եք, այս երկու ամիսների ընթացքում բոլորն ասում են՝ մենք առաջարկում ենք, որ ընդդիմությունը համախմբվի միասնական   սկզբունքների շուրջ, բայց որևէ մեկը չի ասում՝ ես միանում եմ այդ առաջարկներին: Մեր քաղաքական դաշտի հերն անիծել է հենց այդ մոտեցումը ՝ իմ շուրջը պետք է համախմբվեք, իմ առաջարկներն են ճիշտ»:

Կկարողանա՞ն հաղթահարել այս մոտեցումն ընդդիմադիրները, թե ոչ , պարզ կդառնա առաջիկայում։