ՀՀ նախագահի նստավայրում այսօր մեկնարկել են Ամանորի և Սուրբ Ծննդյան տոների կապակցությամբ անցկացվող ամենամյա տոնական միջոցառումները: Բաղրամյան 26 հասցեում հյուրընկալվել են հանրակրթական դպրոցների բարձր առաջադիմություն ունեցող 300 աշակերտներ: Առաջիկա օրերին Բաղրամյան 26-ի հյուրերը կլինեն նաև Հայաստանում ապաստան գտած սիրիահայ, սահմանամերձ բնակավայրերում ապրող, զինծառայողների և զոհված ազատամարտիկների երեխաներն ու թոռնիկները: 6-12 տարեկան ավելի քան 1000 երեխաների համար նախագահական նստավայրում Ամանորի տոնը կդարձնեն անմոռանալի:
Շքեղ տոնածառ, հեքիաթների ծանոթ ու սիրելի հերոսներ, հյուրասիրություն, Ձմեռ պապ, նվերներ և, իհարկե, տոնական բարձր տրամադրություն. Բաղարամյան 26 հասցեում այսօր արվել էր առավելագույնը օրվա հերոսների տոնն անմոռանալի դարձնելու համար: Իսկ հերոսները հանրակրթական դպրոցների բարձր առաջադիմություն ունեցող 300 աշակերտներն էին:
Սեղանների շուրջ նրանք արդեն միմյանց շնորհավորել են, խոզուկի ու նապաստակի հետ լավ պարել, իսկ այժմ՝ կիսվում են տպավորություններով և տոնական մաղթանքներով,
ԱՅԲ դպրոցի սան Մարիա Սարգսյանը Ձմեռ պապից խնդրում է, որպեսզի հայ զինվորը տուն վերադառնա, մեր սահմանը լինի խաղաղ ու ապահով: Փոքրիկների տոնական մաղթանքները փոքր ինչ տխրեցնում են, որովհետև իրականությունը նրանց էլ պարտադրել է գիտակցել մեզ այնքան դժվարությանբ տրվող խաղաղության գինը: Բայց փոքրիկների շուրթերով նաև հույսն ու լավատեսությունն է փոխանցվում։
Տոնական միջոցառումն այսօր եզրափակեց Ձմեռ պապը, որը խոստացավ երեխաներին կատարել նրանց բոլոր ցանկությունները: Եթե Ձմեռ պապն անկեղծ էր, ուրեմն մեզ խաղաղ ու երջանիկ տարի է սպասվում:
Հիշեցնեմ, որ Բաղրամյան 26-ում առաջիկա երկու օրերին ևս իշխանությունը կլինի մանուկների ձեռքերում։
