Երևանի «Ադամանդ» ապրանքա-հումքային բորսան այս տարի տոնում է իր 25-ամյակը: Երկարամյա պատմություն կերտած ընկերությունը տարիների ընթացքում դիմակայել է տնտեսության անցումային շրջանին բնորոշ խոչընդոտները, հաղթահարել միջազգային և տեղական շուկաներում տնտեսական ճգնաժամերն ու գրանցել մեծ հաջողություններ:
25 տարիների գործունեության ընթացքում միջազգային կապերի և ձեռք բերած փորձի արդյունքում բորսան ՀՀ տնտեսությունում ունի իր յուրահատուկ դիրքն ու նշանակությունը: Հաղթահարելով նմանօրինակ դժվարություններ՝ մենք դեռ երկար ենք աշխատելու, հույս է հայտնել Բորսային կոմիտեի նախագահ Գրիգոր Վարդիկյանը և նշել. տարեց տարի բորսայի շրջանառությունն աճում է, այս տարվա եռամսյակի ընթացքում այն կազմել է շուրջ 3.6 մլրդ դրամ:
Ընկերությունն այսօր իր 25-ամյակի կապակցությամբ պատվոգրեր է հանձնել այն կազմակերպություններին, որոնք իրենց հետ անցել են համագործակցության երկար ճանապարհ: Հայաստանի Հանրային ռադիոընկերությունը ևս նրանց շարքում էր: Ընկերությունը բորսայի հետ արդյունավետ և փոխշահավետ համագործակցության արդյուքնում արժանացել է երկարամյա վստահելի գործընկեր պատվավոր կոչմանը:
Բորսայի կառավարիչ Կարեն Եղիազարյան. «Եվս մեկ անգամ ես ուզում եմ ձեզ բոլորիդ հայտնել մեր շնորհակալությունը այսքան տարիներ մեզ հետ արդյունավետ համագործակցելու համար, ձեր վստահության համար: Եվ ևս մեկ անգամ ուզում եմ հավաստիացնել, որ մեր համագործակցությունը կլինի շարունակական, երկարատև և համոզված եմ, որ մեր ընտանքիը կընդլայնվի և կունենանք ավելի շատ գործընկերներ»:
