Teach For All-ը կրթական առաջնորդության համաշխարհային ցանց է, որը միավորում է 63 երկրների անկախ գործընկեր կազմակերպություններին՝ կրթական հավասարության և համակարգային փոփոխությունների նպատակով։ Ցանցը զարգացնում է առաջնորդներ, խթանում երկրների միջև փորձի փոխանակումը և ստեղծում միջազգային համագործակցության հարթակներ, որոնց շնորհիվ տեղական նախաձեռնությունները հարստանում են համաշխարհային փորձով, իսկ հաջողված լուծումները տարածվում են կրթական տարբեր համակարգերում։
Teach For All-ի գործունեության հիմքում ընկած է «համատեղ առաջնորդության» (collective leadership) գաղափարը։ Ըստ այս մոտեցման՝ կրթական անհավասարությունը հնարավոր չէ հաղթահարել միայն ուսուցիչների կամ միայն պետական քաղաքականության միջոցով. անհրաժեշտ է, որ ուսուցիչները, տնօրենները, համայնքները, ծնողները, պետական կառույցները, հասարակական կազմակերպությունները և բիզնեսը համատեղ առաջնորդեն փոփոխությունները։
Ցանցի հիմնական ուղղություններն են.
- Ազգային գործընկեր կազմակերպությունների զարգացումը,
- Ուսուցիչների և ապագա առաջնորդների պատրաստումը,
- Շրջանավարտների առաջնորդության ծրագրերը (Alumni Leadership),
- Երկրների միջև փորձի և նորարարական լուծումների փոխանակումը,
- Կրթական հետազոտությունների և գործնական գիտելիքի տարածումը։
Հայաստանը ներկայացված է ցանցում «Դասավանդի՛ր հանուն Հայաստանի» (Teach For Armenia) կազմակերպության միջոցով, որը Teach For All-ի պաշտոնական գործընկերն է։ Սա հնարավորություն է տալիս.
- Ներգրավվել միջազգային կրթական փորձի և նորարարությունների փոխանակման գործընթացում,
- Համագործակցել աշխարհի տասնյակ երկրների կրթության ոլորտի առաջնորդների հետ,
- Մասնակցել առաջնորդության, հետազոտական և մասնագիտական զարգացման միջազգային ծրագրերի,
- Ներկայացնել Հայաստանի փորձը համաշխարհային կրթական հարթակներում և միաժամանակ տեղայնացնել այլ երկրների հաջողված լուծումները։
Հայաստանի համար ԹՈՒՄՈ-ի մասնակցությունը խորհրդանշական նշանակություն ունի. այն հնարավորություն է տալիս միջազգային գործընկերներին ծանոթանալ հայկական կրթական նորարարություններին և միաժամանակ Հայաստանի կրթական համայնքին ներգրավել համաշխարհային փորձի ու համագործակցության մեջ։
Teach For All կազմակերպության տեսլականն է ստեղծել մի աշխարհ, որտեղ բոլոր երեխաներն ունեն կրթություն, աջակցություն և հնարավորություններ՝ իրենց և հասարակության ավելի լավ ապագան կերտելու համար։ Այդ նպատակին հասնելու համար կազմակերպությունը կենտրոնանում է ոչ միայն դպրոցներում դասավանդման, այլև երկարաժամկետ առաջնորդների համայնքի ձևավորման վրա, որոնցից շատերը հետագայում շարունակում են գործունեությունը կրթության, հանրային կառավարման, քաղաքացիական հասարակության, բիզնեսի և սոցիալական ձեռներեցության ոլորտներում։
- Ինչպե՞ս են համադրվում Թումոյի տեխնոլոգիական կրթության փորձն ու «Դասավանդիր հանուն Հայաստանի»-ի՝ ուսուցիչների և դպրոցների զարգացման ուղղությամբ ունեցած փորձառությունը։
- Ո՞ր կրթական խնդիրներին է արձագանքում Teach For All-ը։
«Դպրության» տաղավարում են «Դասավանդիր հանուն Հայաստանի» ծրագրի առաջնորդության զարգացման ղեկավար Նարինե Վարդանյանը և ԹՈՒՄՕ ստեղծարար տեխնոլոգիաների կենտրոնի գործառնական համակարգերի բարելավման պատասխանատու Նարեկ Արզումանյանը։
