Հոկտեմբերի 14-ից 17-ը դիրիժոր Թեոդոր Կուռենտզիսի ղեկավարությամբ Հայաստանում կանցկացվեն musicAeterna նվագախմբի և երգչախմբի առաջին հյուրախաղերը։
Ինչպես հայտնում են ՀՀ էկոնոմիկայի նախարարությունից, նախագիծն իրականացվում է Վարդուհի Նազարյանի նախաձեռնությամբ և աջակցությամբ։ Կազմակերպիչներն են Հայաստանի ազգային ֆիլհարմոնիկ նվագախումբը և Արամ Խաչատրյան համերգասրահը՝ ՀՀ էկոնոմիկայի նախարարության և Կրթության, գիտության, մշակույթի և սպորտի նախարարության մասնակցությամբ։ Համակազմակերպիչն է Arvest23 հիմնադրամը։
Հոկտեմբերի 14-ից 17-ը դիրիժոր Թեոդոր Կուռենտզիսի ղեկավարությամբ Հայաստանում կանցկացվեն musicAeterna նվագախմբի և երգչախմբի առաջին հյուրախաղերը։
Շրջագայության ծրագրի միջոցառումները կոչված են հրավիրել հանդիսատեսին ուշադրությունը Հայաստանի հարուստ մշակութային ժառանգությանը, ներկայացնել դասական և հոգևոր երաժշտության գլուխգործոցները, ինչպես նաև աջակցել երկրի երիտասարդ տաղանդների զարգացմանը: MusicAeterna-ի գեղարվեստական հայեցակարգը երկար տարիներ հիմնված է մշակույթների սինթեզի, պատմության և արդիականության երկխոսության վրա և հաջողությամբ իրականացվում է երաժիշտների բարձր պրոֆեսիոնալիզմի շնորհիվ:
Համերգային շրջագայությունը կսկսվի հոկտեմբերի 14-ին Երևանի Արամ Խաչատրյան համերգասրահում կայանալիք համերգով, որի ընթացքում musicAeterna նվագախումբը, հարգանքի տուրք մատուցելով ակադեմիական ավանդույթին և միջմշակութային կապերին, կկատարի սիմֆոնիկ ծրագիր՝ նվիրված Պյոտր Իլյիչ Չայկովսկու ստեղծագործություններում Իտալիայի պատկերներին։ Կհնչեն Դանթեի «Ֆրանչեսկա դա Ռիմինի» ստեղծագործության հիման վրա սիմֆոնիկ ֆանտազիան, Իտալական կապրիչիոն և նախերգանք-ֆանտազիան՝ Շեքսպիրի «Ռոմեո և Ջուլիետ» ստեղծագործության հիման վրա։
Հոկտեմբերի 15-ին Արարատ լեռան ստորոտում կցուցադրվի musicAeterna Dance-ի և Թեոդոր Կուռենտզիսի մասնակցությամբ պարային ներկայացումը, որը ստեղծվել է musicAeterna-ի ստեղծագործական նստավայրում՝ Սանկտ-Պետերբուրգի Ռադիոյի տանը։ Մայրամուտին հնագույն Զվարթնոցի տաճարում կցուցադրվի «ԲՈԼՈՐ ԼԵԶՈՒՆԵՐՈՎ ՏԱՌԱՊԱՆՔԸ ՀՆՉՈՒՄ Է ՄԻԱԿԵՐՊ» պար-լացը։ Ռուս ժամանակակից ամենապահանջված պարուսույցներից մեկը՝ Վլադիմիր Վառնավան և ռեժիսոր Աննա Գուսևան այս մարմնային ծեսում ներկայացվում է անմեղ հոգիների համար սգի ծեսը: Ձայնային բազմաալիք ինստալյացիան կմիավորի Հայաստանից ժամանած պրոֆեսիոնալ սգավորի կատարմամբ ծիսական ողբը, էլեկտրոնային աղմուկը, Զվարթնոցի տաճարի շուրջ փչող քամու ձայներն ու բեմադրության հերոսների ձայները։
Շրջագայության ծրագրի գագաթնակետն է Ալֆրեդ Շնիտկեի Երգչախմբային կոնցերտը հայ մեծ փիլիսոփա-աստվածաբան Գրիգոր Նարեկացու ստեղծագործությունների հիման վրա, որոնք համարվում են քրիստոնեական միջնադարի ավանդական հայկական մշակույթի գլուխգործոցներ՝ որպես համաշխարհային արվեստի պատմության մեջ հայկական մշակութային ժառանգության կարևոր մի մաս։
Շնիտկեի Երգչախմբային կոնցերտը դասվում է 20-րդ դարի ամենանշանակալի խմբերգային ստեղծագործությունների շարքին, որը երաժշտական արվեստը բարձրացնում է հոգևոր հայտնության մակարդակի: Կոմպոզիտորը ստեղծագործության վրա աշխատել է 1984-1985 թվականներին՝ իր մկրտության շրջանում, հոգևոր երաժշտության նկատմամբ հետաքրքրության մեծացման և, որպես արդյունք, սեփական ոճի վերաիմաստավորման փուլում։ Կոնցերտը ստեղծվել է հայ ականավոր բանաստեղծ և աստվածաբան, որպես Հրաշագործ մեծարվող Գրիգոր Նարեկացու «Մատյան ողբերգության» ստեղծագործության հիման վրա:
Իր երաժշտության մասին Շնիտկեն ասել է. «Ինձանով գրում են»։ MusicAeterna-ի կատարման մասին կարելի է ասել. «Նրանցով երգում են»: Նարեկացու ստեղծագործության հիման վրա Շնիտկեի կոնցերտը երկար տարիներ կարևոր տեղ է զբաղեցնում երաժշտական այս խմբի խաղացանկում, քանի որ այն մարմնավորում է հոգևորի և աշխարհիկի միասնությունը, համերգային կատարումը վերածում միստերիայի, տրանսցենդենտալ փորձի։ Եվրոպական ամենահեղինակավոր մրցանակների արժանացած musicAeterna երգչախմբի հիասքանչ կատարումը կարելի է լսել հոկտեմբերի 16-ին Երևանի գլխավոր ֆիլհարմոնիկ դահլիճում՝ Արամ Խաչատրյան համերգասրահում, որի ճարտարապետությունն ու դեկորացիան իրավամբ համարվում են ժամանակակից հայ ճարտարապետության գլուխգործոց։
Շրջագայությունը կավարտվի հոկտեմբերի 17-ի լույս 18-ի գիշերը Հայաստանի մշակութային մայրաքաղաք Գյումրիի Սուրբ Աստվածածին եկեղեցում։ Այստեղ Թեոդոր Կուռենտզիսի ղեկավարությամբ համատեղ ելույթ կունենան musicAeterna և musicAeterna byzantina երգչախմբերը, որոնք կկատարեն հին բյուզանդական ավանդույթի եկեղեցական երգեր։ Lux Aeterna («Հավերժական լույս») ծրագիրը միավորում է տասը դարերի ռուսական և եվրոպական հոգևոր երաժշտությունը, որում միահյուսվում են ժամանակակից երգահանների օպուսներն ու միջնադարյան ստեղծագործությունները:
Հյուրախաղերի հարուստ ծրագիրը հանրությանը հնարավորություն է ընձեռնում առնչվել երաժշտական արվեստի տարբեր երևույթների հետ՝ ինչպես ակադեմիական, այնպես էլ ժամանակակից կատարողական ձևաչափերով:
Նախագծի կազմակերպիչներն ու գործընկերները վստահ են, որ ամենադժվար ժամանակներում երաժշտությունը վերադարձնում է հոգևոր հիմքերին, օգնում է և շնորհում հավատ դեպի պայծառ ապագա։
