Ինչպե՞ս են արվեստն ու դրամատուրգիան օգնում հաղթահարել պատերազմի հոգեբանական հետևանքները։ «Հետո ինչ եղավ» վերնագրով նոր գրաֆիկական նովելը երեք տարբեր պատմություններից կազմված վիպակ է, որը մանուկներին օգնելու է հաղթահարել պատերազմի հոգեբանական հետևանքները։
«Մեր նպատակը հենց հոգեբանական խնդիրները լուծելն էր, բայց նաև ուզում էինք որակյալ և սիրուն աշխատանք տալ երեխաներին,– մեկնաբանում է գրքի համահեղինակ, «Պարադիգմա» կրթական հիմնադրամի կրթական ծրագրերի համակարգող Թալին Սաղդասարյանը։
Գրքում տեղ գտած յուրաքանչյուր պատմություն անդրադառնում է մեկ հոգեբանական խնդրի: «Բոլոր 3 պատմություններն ունեն մեկ ընդհանուր գաղափար, որը կարմիր թելի նման անցնում է բոլոր պատմությունների միջով. այն պիտի օգնի հայ մանուկներին մանկուց իրենց կյանքը կառուցել, գիտակցել իրենց կարողությունները, հասարակության մեջ իրենց պիտանելիությունը, նպատակին հասնելու կամքը և դրանք օգտագործել», – ասում է գրքի համահեղինակ, պատկերապատման նկարիչ Տիգրան Մանգասարյանը։
«Հետո ինչ եղավ» գրաֆիկական նովելը լույս է տեսել «Պարադիգմա» կրթական հիմնադրամի նախաձեռնությամբ և Յունիսեֆի հետ համագործակցությամբ։