ԱԺ թե ընդդիմադիր, թե իշխանական խմբակցությունների ներկայացուցիչներն այսօր հանդիպել են խորհրդարանի շենքի մոտ հավաքաված նաիրիտցիների հետ: Նրանց պահանջը նույնն է. պարապուրդի մատնված գործարանի աշխատակիցներն արդեն տևական ժամանակ պահանջում են իրենց չվճարված աշխատավարձերը: Պատգամավորների հետ հանդիպելով՝ նաիրիտցիները փորձել են պարզել, թե ինչպես կարող է իրենց պահանջների լուծմանը օգնել խորհրդարանում ստեղծված հանձնաժողովը: ԱԺ տնտեսական հարցերի մշտական հանձնաժողովում, հիշեցնենք, ենթահանձնաժողով է ստեղծվել, որը պետք է ուսումնասիրի «Նաիրիտում» ստեղծված իրավիճակն ու գործարանի վերագործարկման հնարավորությունները:
Նաիրիտցիների բողոքն ու հարցերը լսել է նաև հանձանժողովի նախագահ Վարդան Այվազյանը:
Որոշվել է, որ վաղը նաիրիտցիներն իրենց հուզող հարցերը գրավոր կներկայացնեն ենթահանձնաժողով, իսկ հաջորդ շաբաթ քննարկում կկազմակերպվի՝ հանձնաժողովի անդամների, նաիրիտցիների և կառավարության ներկայացուցիչների համատեղ մասնակցությամբ:
