Ռուսաստանի նախագահ Վլադիմիր Պուտինը VGTRK-ի թղթակից Պավել Զարուբինին տված հարցազրույցում հայտարարել է, որ երկրում վառելիքի որոշակի պակաս է նկատվում՝ այն, սակայն, որակելով «ոչ կրիտիկական»։
Պուտինը վառելիքի մատակարարման հետ կապված խնդիրները կապել է ռուսական նավթավերամշակման գործարանների և էներգետիկ այլ ենթակառուցվածքների վրա ուկրաինական անօդաչու թռչող սարքերի հարձակումների հետ։ Նրա խոսքով՝ հարվածները վնասներ են պատճառում և խնդիրներ ստեղծում, սակայն վնասված օբյեկտները համեմատաբար արագ վերականգնվում են։
Ինչպես գրում է BBC-ին, Ռուսաստանի նախագահը նշել է, որ վառելիքի պակաս զգացվում է նաև Ռուսաստանի կողմից բռնակցված Ղրիմում և Սևաստոպոլում։ Նրա խոսքով՝ թերակղզում առկա պաշարները կբավարարեն մի քանի օրվա համար, իշխանությունները նախատեսում են ավելացնել մատակարարումները ցամաքային և ծովային ճանապարհներով։
Պուտինի գնահատմամբ՝ իրավիճակը կարգավորելու համար անհրաժեշտ է արագացնել նավթավերամշակման գործարանների վերականգնումը, ապահովել անհրաժեշտ ծավալի վառելիքի ներմուծումը և ուժեղացնել էներգետիկ օբյեկտների հակաօդային պաշտպանությունը։
Ռուսաստանի մի շարք շրջաններում վերջին շաբաթների ընթացքում բենզալցակայաններում հերթեր են գոյացել, իսկ որոշ տարածքներում սահմանափակումներ են մտցվել վառելիքի վաճառքի նկատմամբ։
Կրեմլի հրապարակած հարցազրույցում Պուտինն իսկապես ընդունել է վառելիքի «որոշակի պակասը» և նշել, որ ուկրաինական հարվածները խնդիրներ են ստեղծում էներգետիկ ոլորտում։ Ռուսական մի շարք շրջաններում հաղորդվել է նաև բենզինի վաճառքի սահմանափակումների և լցակայաններում հերթերի մասին։
