Ռուսաստանի վերադարձը «Եվրատեսիլ» տեսականորեն հնարավոր է․ մրցույթի ղեկավարի հայտարարությունը քննադատության ալիք է բարձրացրել

Ռուսաստանը տեսականորեն կարող է վերադառնալ «Եվրատեսիլ» երգի մրցույթ, եթե համապատասխանի Եվրոպական հեռարձակողների միության (EBU) անդամակցության կանոններին, բրիտանական LBC ռադիոկայանին տված հարցազրույցում հայտարարել է «Եվրատեսիլի» տնօրեն Մարտին Գրինը։

Նրա խոսքով՝ Ռուսաստանի հեռացումը մրցույթից պայմանավորված էր ոչ թե անմիջապես Ուկրաինայում պատերազմի փաստով, այլ ռուսական պետական հեռարձակող VGTRK-ի կարգավիճակի հետ կապված հարցերով։ Գրինը նշել է, որ EBU-ն չի կարողացել հաստատել այդ հեռարձակողի անկախությունը Կրեմլից։

«Եթե հարցը վերաբերում է նրան, թե Ռուսաստանը կարո՞ղ է վերադառնալ, եթե իր հեռարձակողը համապատասխանի անդամակցության կանոններին, ապա տեսականորեն՝ այո»,- ասել է Գրինը։

Նրա այս հայտարարությունը քննադատությունների ալիք է բարձրացրել, քանի որ մինչ այժմ լայն տարածում ուներ այն ընկալումը, թե Ռուսաստանի հեռացումը «Եվրատեսիլ»-ից քաղաքական և բարոյական դիրքորոշման արտահայտություն էր՝ կապված Ուկրաինայի դեմ ռազմական գործողությունների հետ։

Գրինը նաև անդրադարձել է Իսրայելի մասնակցության շուրջ վեճերին՝ նշելով, որ այդ հարցում «գլոբալ կոնսենսուս» չկա, ուստի որոշումը պահանջում էր ավելի զգուշավոր մոտեցում։

Մեծ Բրիտանիայի լիբերալ-դեմոկրատ պատգամավոր Թոմ Գորդոնը խիստ քննադատել է այս մեկնաբանությունները՝ դրանք որակելով որպես «բարոյական վախկոտություն»։ Նրա խոսքով՝ եթե Ռուսաստանը կարող է վերադառնալ մրցույթ միայն տեխնիկական պահանջների կատարման դեպքում, ապա դա կասկածի տակ է դնում «Եվրատեսիլի» նախկինում հռչակած արժեքային դիրքորոշումը։